Облыстық жұмыспен қамтуды үйлестіру және әлеуметтік бағдарламалар басқармасының басшысы Полымбет Хасановтың мәліметінше, мүмкіндігі шектеулі жандарға түрлі әлеуметтік қызмет көрсететін төрт арнайы әлеуметтік сауықтыру орталығы жұмыс істейді. Орталықтарда жыл басынан бері 1 456 адамға әлеуметтік қызмет көрсетілді. 17 мыңнан астам мүгедектігі бар адам арнайы портал арқылы қажетті құралдар алып, түрлі әлеуметтік қызметті пайдаланды.
«Оның ішінде 6 797 адам міндетті гигиеналық құралдар, 5 019 адам санаторий-курорттық ем алды. 2 115 адам протездік-ортопедиялық, 1 040 адам тифлотехникалық, 1 001 адам жеке көмекші қызметімен, 434 адам сурдотехникалық, 538 адам арнаулы жүріп-тұру құралдарымен, 205 адам ымдау тілі қызметімен қамтылды», дейді П.Хасанов.
Мемлекеттік әлеуметтік тапсырыс аясында мүгедектерді тасымалдайтын 130 инватакси бар. Мұндай көліктер жүруі қиын 3 346 адамды 200 173 рет тасымалдады.
«Мұндай жұмыстар мұқтаж жандарға қамқорлық көрсету, қолайлы орта құру бағытындағы мемлекеттік саясаттың нәтижесін көрсетеді. Бұл іс-шаралар ерекше қолдауды қажет ететін адамдардың өмір сүру сапасын арттыруға, ортаға толық бейімделуіне мүмкіндік беріп отыр», дейді басқарма басшысы.
Мүмкіндігі шектеулі жандардың арасында қол қусырып қарап отырмайтындар да бар. Соның бірі – 53 жастағы Асылай Ақбергенова.
«Жол апатынан кейін жұлыным зақымданып, ауыр жарақат алдым. Жарақаттың салдарынан арбаға таңылсам да тағдырдың ауыр сынағына мойымадым. Сол кезде 16 жаста едім. Бірақ өмірге құлшынысымды жоғалтпай, 2009 жылы «Мүгедек әлемі» қоғамында еңбек жолымды бастадым. Инватакси қызметінде үш жыл диспетчер болып жұмыс істедім», дейді ол.
Бұдан соң Асылай жұмысын Атырау қаласындағы №7 емхананың тіркеу бөлімінде жалғастырды. Мұнда психолог-реабилитолог ретінде қиналған жандардың қалыпты өмірге бейімделуіне көмегін көрсетеді. 2021 жылдан бері «Biz de adambyz» қоғамдық қорына жүгінген мүмкіндігі шектеулі жандарға үміт сәулесін жағып келеді.
«Түрлі адаммен жұмыс істеймін. Көбінесе ЗПР, ЗРР, РАС диагнозы қойылған балалар, түрлі жарақат алған ересектер келеді. Олардың жан азабын жақсы білемін. Өйткені өзім де арбаға таңылғаннан кейін күйзелісте болғанмын. Бірақ өмірімді өзім ғана өзгерте алатынымды түсіндім. Сол сәттен өмір сүруге құлшынысым артты, қызығушылығым оянды», дейді ол.
А.Ақбергенова би өнеріне де бет бұрды. Он жыл арбада отырып, би биледі. Бұл өнері жемісін беріп, еліміздің үш дүркін чемпионы атанды. Халықаралық сайыстарға қатысып, жүлделі орындарды иеленді. Сондай-ақ пара оқ атудан жеңімпаз болды. Қиындыққа қарсы тұрған қайсар жан жетістіктері үшін «Жаншуақ» сыйлығымен марапатталды.
Атырау облысы
