Бес кезеңнен 100-ден аса ғана кандидат өткен. Олар мемлекеттік саланы дамытуға қатысты жобаларын таныстырды. Алайда соңғы іріктеуден тек 50 маман суырылып шыққан. Жастардың арасында білім магистрлері, Болашақ бағдарламасының стипендианттары мен мемлекеттік басқару академиясының түлектері бар.
Биылғы төртінші іріктеудегі басты жаңашылдық мемлекеттік аппарат үшін аса сұранысқа ие салалық бағыттар бойынша резервті қалыптастыру болды. Яғни кандидаттар белгіленген квоталарға сәйкес қабылданды.
Инфографиканы жасаған – Зәуреш Смағұл, «ЕQ»
Осылайша, «Инфрақұрылымды, өнеркәсіпті дамыту және сауда саясаты» бағыты бойынша – 8, «Агроөнеркәсіптік кешен және қоршаған ортаны қорғау» бағыты бойынша – 9, «Сыртқы саясат және инвестициялар» бағыты бойынша – 8, «Экономикалық және қаржылық саясат» бағыты бойынша – 7, «Цифрландыру» бағыты бойынша – 9, «Әлеуметтік саясат және азаматтық қоғам» бағыты бойынша 9 азамат іріктелді.
Сыннан сүрінбей өткен жастар Мемлекеттік қызмет істері агенттігінің төрағасы Дархан Жазықбаймен кездесті. Жиында резервшілердің алдағы жоспары, мүмкіндігі, басқару құзыретін дамытуға арналған білім бағдарламаларына қатысу мәселелері талқыланды.
«Президенттік жастар кадрлық резерві – Мемлекет басшысы Қасым-Жомарт Тоқаевтың тікелей бастамасымен жүзеге асып жатқан еліміздің жаңа формациядағы білімді, жауапты әрі отаншыл жастарын мемлекеттік басқару ісіне тартуға бағытталған ерекше стратегиялық маңызға ие бастама. Бұған дейін резервке қабылданған 321 жас маманның 80%-ы түрлі секторда табысты еңбек етіп жүр. Оның ішінде 37-сі – саяси лауазымда, бесеуі – «А» корпусында, 100-і – «Б» корпусында, төртеуі – депутат, ал 175 адам басқа лауазымдарда қызмет атқарып жатыр. Резервке қабылдану – бірден жоғары лауазымға тағайындалу деген сөз емес. Бұл – жастарға мемлекеттік қызмет жүйесінде өз әлеуетін толық көрсетуге, білімі мен біліктілік деңгейіне, кәсіби дағдысына сүйене отырып ілгерілеуге берілген мүмкіндік», дейді Д.Жазықбай.
Резерв мүшелері басқарушылық құзыретті дамытуға бағытталған заманауи оқыту бағдарламаларына қол жеткізе алады. Әрі үш жыл ішінде саяси мемлекеттік қызметтерге, «А» корпусының әкімшілік мемлекеттік лауазымдарына, сондай-ақ «Б» корпусының басшылығы қызметіне тағайындалуы мүмкін.
Биылғы іріктелген қатысушылардың орташа жасы – 31. Орташа еңбек өтілі – 9 жыл. Резервшілердің 28 пайызы әйел болса, 72 пайызы – ерлер.
Алты кезеңнен ойдағыдай өтіп, резервке енгендердің қатарында Жасұлан Қуандық бар. Бала күнінен мемлекеттік қызметкер болуды армандаған жас 2019 жылдан бері осы жобаға қатысып, бағын сынап келген. Әр жылдары техникалық, кейде құжаттың толық болмауына байланысты өте алмаған. Биыл бағы жанып, 50 үздіктің қатарына енді.
«Бесінші сыныптан бастап өзіме «әкім боламын» деп мақсат қойдым. Сол себепті Әл-Фараби атындағы Қазақ ұлттық университетінің «Мемлекеттік және жергілікті басқару» мамандығына грантқа түсіп, кейін магистратурада «Іскерлік әкімшілендіру» бойынша білім алдым. Ізінше докторантураға Мемлекеттік және жергілікті басқару мамандығына тапсырдым. Осы 9 жыл бойы жинаған білімім мен тәжірибем мемлекеттік басқару саласында еңбек етуге бағытталды. Енді сол білімді нақты істе көрсету уақыты келді деп ойлаймын. Әр кезең өз алдына күрделі болды. Кей сәттерде «осы жолы өте алмай қалам ба?» деген ойлар да мазалады. Бірақ осы уақытқа дейін түрлі салада жинаған тәжірибем байқауда үлкен көмегін тигізді. Қазіргі уақытта қайырымдылық қорының президенті ретінде халықпен тікелей жұмыс істеймін. Меніңше, нағыз мемлекеттік қызметкердің бір қасиеті – халықпен тіл табыса білу. Осы тәжірибе мен қарым-қабілетім мемлекеттік қызметте де үлкен пайдасын тигізеді деп сенемін», дейді Президенттік жастар кадр резервінің мүшесі Ж.Қуандық.
