Суретті түсірген – Валерий БУГАЕВ
Жалпы құны 30,4 млрд теңгені құрайтын бұл жоба – Павлодар облысы аумағында жүзеге асырылуы жоспарланған үш ірі өндірістік кешеннің алғашқысы. Барлық нысан іске қосылғаннан кейін еліміз қара және түсті металлургияда, машина жасау, көлік және басқа да өнеркәсіп салаларында кеңінен қолданылатын стратегиялық маңызды материал – ферроқорытпа өндірісі бойынша әлемде 2-орынға шығуға мүмкіндік алады.
Зауыт халықаралық экологиялық, технологиялық қауіпсіздік стандарттарына толық сәйкес келетін екі заманауи электр пешімен жабдықталған. Жоғары технологиялық кәсіпорын 99,9% тиімділікпен ауаны тазартуды қамтамасыз ететін заманауи гибридті сүзгілермен жабдықталған және ең жоғары экологиялық талаптарға жауап береді. Жобаны жүзеге асыру аясында 350-ден астам жаңа жұмыс орны құрылады.
«Бұл – Ертіс-Баян өңірі аумағында Қазақстанды ферроқорытпа өндірісі бойынша әлемдік көшбасшылар қатарына қосуға қабілетті толыққанды металлургиялық кластерді құруға бағытталған стратегиялық қадам. Екібастұз еліміздің негізгі өндірістік орталықтарының біріне айналып келеді, ал бүгінгі оқиға өңірдің индустриялық дамуының жаңа кезеңінің басталуын білдіреді», деді облыс әкімі Асайын Байханов.
Өңір басшысы мен «KazFerroLimited» ЖШС бас директоры Қайрат Нүкенов символдық түрде алғашқы электр пешін іске қосу рәсіміне қатысты. Одан соң өңір басшысы жаңа кәсіпорынның негізгі өндірістік аймақтарын аралап, технологиялық үдерісті толық бақылауда ұстайтын операторлық бөлімге барды. Сонымен қатар металдың алғашқы құйылу үдерісіне куә болды.
Павлодар облысы,
Екібастұз қаласы
