Қостанайда жол апатынан 4 адам қаза болды

ҚОСТАНАЙ. 19 ақпан. Қостанай облысының Денисов ауданынан өтетін «Қостанай-Қарабұтақ» тас жолының бойында ауыр жол-көлік оқиғасы орын алды. Бірден 4 адам қаза болды. Бұл туралы egemen.kz тілшісі хабарлады. «Хюндай Соларис» машинасын жүргізіп келе жатқан 1988 жылы туған Өзбекстан азаматы рульге ие бола алмай, қарсы бетке шығып кетіп, келесі бағытта келе жатқан «Даймлер Бенц» автокөлігіне соқтығысады. Соның салдарынан «Хюндай Соларис» машинасының 4 жолаушысы тіл тартпай кетті. Барлығы да 1986-1991 жылдары туған жастар, үшеуі Өзбекстан, біреуі Қазақстан азаматы. Осы көліктің бір жолаушысы ауыр халде Денисов ауданындық ауруханасына жеткізілді, әлі есін жиған жоқ. Ал «Даймлер Бенц» көлігінің 1955 жылы туған жүргізушісі де, екі жолаушысы да дін аман. Жеңіл жарақаттары бар, бір жолаушыға тіпті сызат түспеген. Нәзира Жәрімбетова. Дерек, сурет: egemen.kz.