Суретті түсірген – Ерлан ОМАР, «EQ»
Ақерке ИСКАНДЕРОВА,
«Жастар рухы» ЖҚ төрағасы:
Ұлттық мерекеге қызығушылық артты
Кейінгі жылдары жастар Республика күнін жеке демалыс ретінде ғана емес, өзінің ел алдындағы орнын сезініп, азаматтық белсенділігін көрсетуге мүмкіндік ретінде қабылдай бастады. Бұл ретте «Жастар рухы» жастар қанаты жыл сайын Республика күніне орай кең ауқымды іс-шаралар ұйымдастырады. Биыл да дәстүрден жаңылмай, 3 қала мен 17 облыстық филиалда бір мезетте өтетін мазмұнды іс-шаралар кешені дайындалды. Соның ішінде ерекше атап өтерлігі – «Менің елім – менің туым» атты патриоттық бастама.
Акция – жастардың бойындағы елге деген сүйіспеншілікті, мақтаныш сезімін нығайтатын нақты әрекет. Былтыр алғаш рет «Amanat» партиясының орталық аппаратында еліміздің ең үлкен Туы (24×12м) ілініп, бүкіл республикаға әсерлі рәміз ретінде танылды. Бұл Ту кейіннен жауапты футбол матчтарында, халықаралық деңгейдегі концерттерде, оның ішінде Димаш Құдайбергеннің өнер кешінде желбіреп, рух пен бірліктің көрінісіне айналды.
Биыл алғаш рет республикалық деңгейде тарихи орындарға, музейлер мен ескерткіштерге арнайы экскурсиялар ұйымдастырылып отыр. Мұның бәрі ұрпақтың ішкі рухани өзегін қалыптастыруды көздейді. Ал ұлттық сана, азаматтық жауапкершілік, тарихи жадсыз ел болу мүмкін емес. Жастар қанатының міндеті – жастардың сана-сезімін ояту, ой салу.
Жандос АҚТАЕВ,
«Esbol Qory» қоғамдық қорының төрағасы:
Ел ертеңі – сергек санада
Республика күні – жай ғана мереке емес, ұлттың тағдырына, елдің ертеңіне деген жауапкершілікті еселей түсетін күн. 35 жыл бұрын қабылданған Егемендік декларациясы – халқымыздың ғасырлар бойы аңсаған тәуелсіздік арманына жол ашқан тарихи қадам. Сондықтан 25 қазан – бүгінгі жетістіктерімізді бағалап, елдік мұратты келер ұрпаққа аманат ету міндетін еске салатын айтулы күн.
Бүгінде мемлекеттің болашағы шекарамен, саяси дербестікпен не заңдық мәртебемен өлшенбейді. Қазір әлемдегі қауіп-қатер сана кеңістігінен басталады. Демек нағыз егемен ел болу – рухани, әлеуметтік және физиологиялық тәуелсіздікке жету, әр азаматтың еркін ойлап, еркін өмір сүре алуы деген сөз.
Ел егемендігін қорғаудың жаңа формасы – жастардың санасын қорғау. Ал нашақорлық, интернет арқылы таралатын бүлдіргі идеологиялар мен тәуелді мінез-құлық – ұлт болашағына төнген ең күрделі қауіп. «Esbol Qory» осы бағытта бірнеше жыл қатарынан жүйелі жұмыс жүргізіп келеді. Біз тек нашақорлықтың алдын алу емес, жалпы саламатты өмір мәдениетін қалыптастыруды мақсат етеміз. Төл жобаларымыздың басым бөлігі жас буынның құқықтық, қаржылық және медиа сауатын арттыруға, өз өміріне жауапкершілікпен қарауға бағытталған. Осылайша, біз цифрлы заманда ұлттық сананы нығайтып, мемлекеттің рухани іргесін бекітеміз.
Нұрасыл БЕКМАТОВ,
«Jasyl el» жастар еңбек жасақтары республикалық штабының басшысы:
Жауапкершіліктің орны бөлек
Республика күні – жастар үшін өз елінің тағдырына бейжай қарамауға шақыратын, ел мүддесін қорғауға жігер беретін мереке. Маңызды дата – әр жасқа: «Мен – Қазақстанның азаматы ретінде еліме қандай үлес қосып жүрмін?» деген ой тудырады. Міне, бұл елге, жерге деген сүйіспеншілікті қалыптастырады. «Jasyl el» қозғалысының басты миссиясы да осы – патриоттық сезімді нақты іске айналдыру, жастардың әлеуетін ел игілігіне бағыттау.
2005 жылдан бері қозғалыс ел жастарын табиғатты қорғау, абаттандыру, көгалдандыру жұмысына жұмылдырып келеді. Мыңдаған жас тек табиғатты қорғап қоймай, отансүйгіштік пен еңбекқорлыққа тәрбиеленді. Бұл – ең алдымен еңбекке, ұлтқа, жерге деген құрметті үйрететін үлкен мектеп.
Әлішер САДЫҚ,
Ақтөбе қалалық жастар ресурстық орталығының басшысы:
Төл құндылықтарды қастерлейміз
Қазіргі таңда жастар тәуелсіздікке арқау болған мерекені үлкен ілтипатпен қабылдайды. Өйткені жас буын еліміздің егемендігі, жалпы төл құндылықтарымызды өміршеңдігі үшін белсенді әрекет етіп жүр. Олардың білім, ғылым, мәдениет және спорт салаларындағы жетістіктерін жиі көремін. Шетелде жүрсе де, туған елінің атын асқақтатып жүрген жастарымыздың табысы – бәріміз үшін зор мақтаныш. Бұл – тәуелсіз елдің жаңа буынының қандай деңгейге көтерілгенінің айғағы.
Бұрын ұлттық киім тек Наурыз мерекесінде киілсе, қазір қоғамның көзқарасы өзгерді. Ол күнделікті образға айналды. Бұл ретте жастардың үлесі басым. Өзім он жыл бойы «Жүректен жүрекке» еріктілер тобында қызмет еттім. Бұл – таза қоғамдық бағыттағы жұмыс. Сол аралықта түрлі қайырымдылық акциялары, спорттық турнирлер мен мәдени іс-шаралар ұйымдастырып, қаржы жинап, қиын жағдайдағы отбасыларға азық-түлік, киім-кешек, дәрі-дәрмек жеткіздік, кейбіріне баспана алуға да жәрдемдестік. Осындай істер арқылы талай адамның өміріне үміт сыйладық.
Қазіргі жастардың басты ерекшелігі де сол – олар белсенді өмірлік ұстанымды қолдайды, қоғамға пайдалы болуды көбірек ойлайды. Меніңше, мерекелердің бәсін биіктете түсетін де – осы дүниелер.
Ақнұр ТҰРДАЛИЕВА,
«Жас ұлан» бірыңғай балалар мен жасөспірімдер ұйымы» республикалық қоғамдық бірлестігінің басшысы:
Тәрбие – талбесіктен
Егемендік декларациясы – ұлттың өз тағдырын өзі шешуге, өз болашағын өзі құруға берілген мүмкіндік. Ал бүгінгі болашақтың иесі – жас ұрпақ. Сондықтан тәуелсіз елдің іргетасы ұрпақ тәрбиесінен бастау алуы заңдылық. Осы тұрғыда еліміздегі ең ірі балалар мен жасөспірімдер қозғалысы – «Жас ұлан» бірыңғай балалар мен жасөспірімдер ұйымының жұмысы егемендіктің мәнін терең ұғындыруға және ұлттық сананы қалыптастыруға бағытталып келеді.
Біздің ұйым 2011 жылдан бастап әр өңірдегі мыңдаған мектеп оқушыларын біріктіріп, елжандылыққа, еңбексүйгіштікке, жауапкершілікке баулып келеді. Бүгінде ұйымның қатарында
3 миллионнан аса жасұландық бар.
Бүгінгі жас ұлан – ертеңгі ел тірегі. Біз тәуелсіз елдің ертеңін сенімді қолда қалдыру үшін еңбек етеміз. Балалардың бойындағы ерік-жігер, ізденіс пен шығармашылықты дамыта отырып, адал ойлы, әділ мінезді, мейірімді де жауапкершілігі басым ұрпақ тәрбиелейміз.
Дайындаған –
Зейін ЕРҒАЛИ,
«Egemen Qazaqstan»
