Дәл осы ауданға 1978 жылы Қазақстанның мемлекет және қоғам қайраткері, сол кездегі бірінші хатшы Дінмұхамед Қонаев келіпті. Жергілікті басшылар Индербор – Қарабау жолының бойындағы «Оңдасын жалында» аудандағы қазба байлықтың сан түрінен арнайы көрме ұйымдастырып, игеру мәселесін көтеріпті. Содан кейін тұрғындар бұл дөңді «Димаш төбе» деп атайтын болды.
Аудандық құрылыс бөлімінің басшысы Дарын Ілиясовтың айтуынша, аңыз тұлға аялдаған төбеде ашық аспан астындағы мұражай салынып жатыр. Нысанның құрылысы 2023 жылы қарашада басталды. Оны жыл соңына дейін аяқтау жоспарланыпты.
«Бұл – Индербор кентінен 8 шақырым қашықта орналасқан тарихи орын. Облыс әкімінің ұсынысымен аталған тарихи орынды қайта жаңғыртып, ашық аспан астындағы мұражайға айналдыруды көздедік. Сол себептен, бұл орынды өңірлік туристік картаға енгізу мақсатында жаңа жоба дайындалды. Жобаға сәйкес ашық мұражайға кірер тұстағы маңдайшаға «Димаш төбе» атауы жазылады», дейді Дарын Ілиясов.
Оның дерегіне қарағанда, мұражай маңдайшасы доға пішіндес болады. Маңдайшаның сол жақ бағанына сол кезде түсірілген тарихи фотоның көшірмесі қойылып, оң жағына нысан жөнінде ақпарат беріледі. Ал мұражайдың аумағына Дендер күмбезіндегі қазба байлықтың түрлері, оның ішінде минерал тастар мен рудалар салынған бірнеше жәшік орнату көзделген. Жәшіктер тастан жасалады. Сондай-ақ екі үлкен күмбезді композиция орнатылады.
«Бұл кешен Индер ауданындағы табиғи байлықтың ерекшелігін танытатын әрі туристерді көптеп тартуға ықпал ететін нысан болады. Сол себептен, «Димаш төбені» өңірдің тарихи-танымдық және туристік әлеуетін арттыратын танымал орынға айналдыруды жоспарлап отырмыз. Өйткені бұл кешен бір ауданның ғана емес, өңірдегі археологиялық жәдігерлерді, минерал тастар мен тарихи-мәдени мұраларды жинақтайтын бірегей орталыққа айналады», дейді Д.Ілиясов.
Жаңа кешеннің аумағы – 1750 шаршы метр. Нысанның құрылысын «СК Лира» ЖШС жүргізіп жатыр.
Атырау облысы
