Солтүстік Қазақстанда грек-рим күресінен ел чемпионаты өтті

ПЕТРОПАВЛ. 23 маусым. Еліміздің 14 облысы мен екі қаласынан Қызылжар өңірінен келген 200 жасөспірім балуан грек-рим күресінен белдесіп, әлем чемпионатының жолдамаларын сарапқа салды. Бұл туралы облыстық денешынықтыру және спорт басқармасының мамандары хабарлады. Қазақстан чемпионатында 20 жасқа дейінгі балуандар 8 салмақ дәрежесі бойынша күресті. Жарыс шымылдығын бірінші болып петропавлдық студент Аманбол Бекболатов ашты. Ол төрт қарсыласын айқын басымдықпен жеңіп, финалда ақтөбелік Мейрамбек Надырбаевпен кездесті.  Оны 45 секундта 8:0 есебімен ұтып, 50 кило салмақта жеңістің ең биік тұғырына көтерілді. Қалған салмақтар бойынша Ернар Фейдахметов (55 кг.., ШҚО), Айдос Сұлтанғалиев (60кг., Қызылорда), Самат Әлжапаров (66 кг.,Алматы облысы), Жасұлан Маратов (74 кг.,Ақтөбе), Агит Сүлейменов (84 кг., ОҚО),.Әнуар Ниязов (96 кг., Алматы облысы),  Данияр Марвен (120 кг., Алматы қаласы). Өз салмақ дәрежелері бойынша жеңімпаз атанған балуандар тамыз айында Бразилияда өтетін әлем чемпионатында ел намысын қорғайтын болады. Өмір Есқали. Дерек: Солтүстік Қазақстан облыстық денешынықтыру және спорт басқармасы. Сурет: egemen.kz