«Бұл – ауыл ғана емес, ауданымыз үшін үлкен қуаныш. Орын саны 4,5 мыңға көбейіп, үшауысымды мектеп саны 9-дан 3-ке кеміді. Биылдың өзінде «Келешек мектептері» бағдарламасы аясында 3 мектеп іске қосылып отыр. Бұл – өскелең ұрпаққа жасалған қамқорлық, ел ертеңіне салынған инвестиция», деп атап өтті аудан әкімі Нұрлан Ертас.
Жаңа мектепке 430 оқушы қабылданса, олардың ішінде 26 балдырған мектеп табалдырығын алғаш аттап отыр. Білім ошағы заманауи талаптарға сай жабдықталған. Кең де жарық сынып кабинеттері мен спорт және еңбекке, өнерге баулитын арнайы залдар қажетті құралдармен жабдықталып, оқушылардың жан-жақты дамуына қолайлы жағдай жасалған.
Сондай-ақ Іле ауданына қарасты Мұхамеджан Түймебаев ауылында 900 орындық жаңа мектеп пайдалануға берілді. Бұл нысан «Amanat» партиясының сайлауалды бағдарламасы аясында бой көтеріп, партияның тікелей бақылауында болған.
«Партия апатты және үшауысымды мектептерді жоюды міндет етіп қойды. Екі жыл бұрын облыста мұндай 52 мектеп болған. Бүгінгі мектептің ашылуы – сол уәденің орындалғанының дәлелі. Ол – Жол картасында белгіленген 63 нысанның бірі. Мұнда «STEM» зертханасы, роботтехника кабинеті, спорт және шығармашылық сыныптар жабдықталған», деп атап өтті облыстық филиалдың атқарушы хатшысының орынбасары Аслан Көбентаев.
Жаңа оқу жылында Еңбекшіқазақ ауданына қарасты Төле би ауылында да 450 орындық жаңа мектеп ашылды. Оның құрылысы қаржыландыру тапшылығына байланысты төрт жылға жуық уақытқа созылып кеткен еді. Осы уақыт аралығында 600-ден астам оқушы тар әрі жарты ғасыр бұрын салынған ескі ғимаратта білім алуға мәжбүр болды.
Жобаның аяқталуына «Amanat» партиясы тікелей араласты. Партия бастамасымен облыстық бюджеттен қосымша қаражат бөлініп, фракция депутаттары құрылыс барысын тұрақты бақылауда ұстады. Соның нәтижесінде ауыл тұрғындарының көптен күткен арманы орындалып, жаңа мектеп өз есігін айқара ашты.
Айта кетейік, білім инфрақұрылымын дамыту – «Amanat» партиясының басты басымдықтарының бірі. Жаңа мектептердің ашылуы үшауысымды оқытуды азайтып қана қоймай, мұғалімдер үшін тұрақты жұмыс орындарын көбейтуге, сондай-ақ мыңдаған оқушыға заманауи әрі қауіпсіз жағдайда білім алуға мүмкіндік береді.
«Бүгін облысымыздағы 491 мектеп есігін айқара ашып, 362 мыңнан аса оқушы оқу жылын бастады. Осы оқу жылында 1-сыныптың өзіне ғана 35 500 бала қабылданып отыр. Бұл барлық бала санының 10 пайызын құрайды және өңірде бала санының қарқынды өсіп отырғанын көрсетеді», дейді облыстық білім басқармасының басшысы Арайлым Ақсубайқызы.
Алматы облысы
