«Отыз жыл бұрын Қазақстан халқы тағдыршешті таңдау жасап, елдің стратегиялық даму бағытын айқындаған Конституцияны қабылдады. Ол демократиялық қағидаттарды бекітіп, адам мен азаматтың құқықтары мен бостандықтарын қорғау жүйесін қалыптастырды. Дәл осы нормалардың арқасында елімізде ауқымды реформалар дәйекті түрде жүзеге асуда», – деп атап өтті ведомство басшысы.
Мемлекеттік органдар жүйесінде прокуратураға ерекше рөл берілген – ол заңдылық пен конституциялық тәртіптің қорғаушысы. Кейінгі отыз жылда прокуратура органдары Ата Заңның үстемдігін қамтамасыз етіп, азаматтардың құқықтарын, мемлекет пен қоғамның мүдделерін қорғап келеді.
Бас Прокурор «Прокуратура туралы» Конституциялық заңның қабылдануы конституциялық жүйенің дамуына маңызды қадам болғанын және прокуратураның мемлекеттің құқықтық құрылымындағы айрықша миссиясын бекіткенін атап өтті. «Біздің жұмысымыздың әрбір бағыты – Конституция прокуратураға заңдылықтың сақталуын жоғары қадағалау мен азаматтардың құқықтарын қорғауды жүктеген нормаларды іске асыру болып табылады», – деді Б.Асылов.
Сонымен қатар ол қарқынды өзгерістер жағдайында прокуратураның заманауи органға айналып, конституциялық реформаларға үйлесімді түрде кірігіп жатқанын, цифрлық технологияларды белсенді енгізіп, бизнесті, инвестицияны, балалардың құқықтары мен қоғам мүдделерін қорғауды күшейтіп отырғанын айтты.
