Зағип жандар оны облыстық кітапханада және арнайы кітапханада оқи алады. Осылайша, елімізде көзі көрмейтін және нашар көретін азаматтардың өз құқықтарын қорғауға, заңнамалық сауатын жетілдіруге, мүмкіндіктерін көрсетуге тамаша мүмкіндік жасалып отыр.
С.Торайғыров атындағы облыстық кітапханада Конституцияның 30 жылдығына арналған іс-шара өтіп, онда Конституция кітабының брайль шрифімен басылып шыққан жаңа нұсқасы таныстырылды. Кітап атаулы мерейтойға орай Жоғарғы соттың тапсырмасымен жарық көрген.
«Біздің қолымызда Конституцияның бірнеше нұсқасы бар: жалпақ баспа форматында, Брайль қарпінде және флешкаға жазылған MP3 аудио нұсқасында. Көпшілігі жұмысқа келгенде немесе қажет болғанда қажетті баптарын тауып алып оқиды. Мәселен, 28-бапта азаматтарға ең төменгі жалақы мен әлеуметтік төлемдердің мемлекет тарапынан кепілдендірілетіні жазылған. Бұл баршамыз үшін маңызды», деді тұсаукесерге қатысқан Қазақ зағиптар қоғамының төрағасы Дүйсенбі Қабдулов.
Ұйымдастырушылар атап өткендей, бұл игі бастама – көзі көрмейтін жандардың елдің басты құжатымен еркін танысып, азаматтық құқығын терең ұғынуына мүмкіндік беретін тың қадам. Зағип жандар бұл кітап арқылы өздерінің қоғамдағы толыққанды мүшесі екенін тағы бір мәрте сезінетін болады.
Павлодар облысы
