Шілде айының соңында Маңғыстау облысының әкімі Нұрдәулет Қилыбай Қытай Халық Республикасына жұмыс сапарымен барып, өңірге инвестиция тарту және ірі жобаларды ілгерілету мақсатында Қытайдың жетекші компаниялары мен мемлекеттік құрылымдарының басшыларымен бірқатар ресми кездесу өткізді. Осы сапарда қол жеткізілген ынтымақтастықты арттырып, келісімдерді бекіту үшін «Ақтау теңіз порты» арнайы экономикалық аймағының делегациясы Цзинин қаласында өткен «Шекарааралық сауданы дамытуға арналған жаһандық шешімдер» конференциясында Маңғыстау облысының инвестициялық мүмкіндіктерін таныстырып, «Ақтау теңіз порты» АЭА-ның артықшылықтары мен келешегіне тоқталды.
«Мұндай кәсіпорындар Маңғыстауда ашылса, еліміздегі мұнай компаниялары өнімді шетелден емес, өзімізден алар еді», дейді АЭА басқарма төрағасының орынбасары Асылбек Досанов.
2024–2025 жылдары Маңғыстау өңірінің туристік, көлік-логистикалық әлеуеті мен өңдеу өнеркәсібін дамыту мақсатында 1730 гектар Ақтау халықаралық әуежайының аумағы, 178 гектар Ақтау қаласының жағалау аймағы, 280,2 гектар Жаңаөзен қаласының өнеркәсіптік аймағы және 284,6 гектар Саржа теңіз терминалы «Ақтау теңіз порты» АЭА аумағына қосылды.
Тікелей инвестиция тарту мақсатында «Ақтау теңіз порты» АЭА құрамына 3 жаңа субаймақты қосу жұмысы жүргізіліп жатыр.
«Осы субаймақтардың ішінде Мұнайлы ауданы субаймағы бойынша аудан әкімдігі жер учаскелерін мемлекет меншігіне алу жұмысын жүргізіп жатыр. Бұл аймақта өсіп келе жатқан нарықтың қажеттілігін қамтамасыз ету және тауар айналымының тиімділігін арттыру мақсатында қойма және логистикалық инфрақұрылымды дамыту жоспарланған, дейді «Ақтау теңіз порты» АЭА» АҚ басқарма төрағасы Мүбәрак Төлегенов.
Айтуынша, жоспарланған іс-шаралар жүзеге асқан жағдайда «Ақтау теңіз порты» АЭА аумағы 4 407,5 гектардан 26 885,4 гектарға дейін ұлғаяды.
Маңғыстау облысы
