Мемлекет басшысы Қасым-Жомарт Тоқаев өз Жолдауында есірткіге қарсы күресті ұлттың генофондын сақтау мәселесі екенін атап көрсеткен еді. Осыған байланысты Бас прокуратура мен уәкілетті органдар есірткі және прекурсорларды жеткізу арналарын, есірткі зертханаларын жоюға, қылмыстық топтар мен есірткі бизнесін ұйымдастырушыларды анықтауға, қылмыстық кірістер мен мүлікке тыйым салуға, сондай-ақ оларға көмектесетін құқық қорғау органдарының қызметкерлерін әшкерелеуге бағдарланды.
Бас прокуратураның баспасөз қызметі Маңғыстау мен Ұлытау облысы, Алматы және Шымкент қалаларында есірткі дүкендерін ұйымдастырушыларды әшкерелеген арнайы прокурорлар сапалы тергеу амалдарын жүргізіп, бұл бағытта белсенді жұмыс атқарғанын жеткізді.
«Прокуратура органдарының үйлестіруімен биыл құқық қорғау және арнайы органдар есірткі және психотроптық заттарды жеткізудің 111 арнасының жолын кесті. Заңсыз айналымнан 9 тонна есірткі (оның ішінде 254 кило синтетикалық есірткі) және 12 тонна прекурсорлар тәркіленді. Есірткі және прекурсорлар контрабандасының фактілері 182-ден 80-ге дейін төмендеді. Яғни 56%-ға азайды», делінген хабарламада.
Бұған қоса Бас прокуратура құқық қорғау органдарымен бірге екінші деңгейдегі банктердің жұмысына интернет кеңістігіндегі есірткі дүкендеріне байланысты банктік шоттарды анықтау, бұғаттау және тәркілеу алгоритмін енгізген. Барлық іс бойынша қаржылық тергеу жүргізу, соның ішінде қылмыстық ақшаны, есірткі бизнесінің түпкілікті бенефициарлары мен ұйымдастырушыларын, сондай-ақ «dropper» аударымдары және басқа да заңсыз операциялар үшін банктік шоттарын ұсынатын азаматтарды анықтау туралы нұсқау беріліпті.
Сонымен қатар құқық қорғау және мемлекеттік органдар «Кибернадзор» ақпараттық жүйесі арқылы есірткі дүкендерін бұғаттау жұмыстарын жүргізіп жатыр. Оның көмегімен бүгінде есірткі саудалайтын 6 мыңнан аса сайт бұғатталған.
