Сурет: egov.kz
Былтыр 96,9 мыңнан астам өтінім сырттай форматта қаралып, куәландырудан өткен мүгедектігі бар адамдардың жалпы санының 37,4%-ын қамтыды. Мемлекет басшысы ерекше қажеттіліктері бар адамдарға барынша қолайлы жағдай жасауды тапсырған-ды. Олар инстанциялардан өтуде қағазбастылықтан арылуға тиіс екенін қатаң ескертті. Осы тапсырманы орындау мақсатында Еңбек және халықты әлеуметтік қорғау министрлігі Денсаулық сақтау, Цифрлық даму, инновациялар және аэроғарыш өнеркәсібі министрліктерімен бірлесіп еліміздің барлық 20 өңірінде қанатқақты режімде медициналық-әлеуметтік сараптама (МӘС) жүргізудің сырттай форматы жобасын іске асырып жатыр.
Мүгедектік тобын белгілеу жөніндегі қызметті алуға өтініш берушіге тұрғылықты жеріндегі емханаға жүгіну, қажетті тексеруден өту керек, қалған үдерістер жүйелерді интеграциялау есебінен оның қатысуынсыз орындалады.
Сырттай куәландыруға көшу біріншіден, әкімшілік һәм бюрократиялық кедергілерді жояды. Екіншіден, МӘС сараптамалық шешімдерінің ашықтығын қамтамасыз етеді. Сонымен қатар мүгедектікті белгілеу, мүгедектігі бар адамдарды әлеуметтік қорғау шараларын анықтау қызметтерін үйден шықпай-ақ алуға мүмкіндік береді. Ең бастысы, көрсетілетін қызметті алушының көрсетілетін қызметті берушімен тікелей байланысы болмайды, сол арқылы сыбайлас жемқорлық тәуекелдері азаяды.
