Облыстық полиция департаментінің хабарлауынша, тәртіп сақшылары далалық аумақта жануардың етін бұзып жатқан ер адамды байқап қалған. Тексеру барысында оның 30 жастағы Алға ауданының тұрғыны екені анықталған. Аталған азамат бұланды аң аулау ережелерін бұза отырып, заңсыз түрде атып алғанын мойындаған. Ол жануарды етін пайдалану мақсатында атқанын айтқан.
«Аңшының көлігін тексеру кезінде тіркелген ұзын ұңғылы карабин табылып, айғақзат ретінде тәркіленді. Қазіргі таңда Қылмыстық кодекстің 337-бабы бойынша (заңсыз аңшылық) іс қозғалды. Сараптамалар тағайындалып, көлік аудандық полиция бөліміне жеткізілді», делінген облыстық ПД таратқан хабарламада.
Айта кетейік, аталған бап бойынша күдікті үш жылға дейін бас бостандығынан айырылуы мүмкін. Сонымен қатар, заңсыз аңшылық жасаған азаматтың мүлкін тәркілеу түріндегі жаза да қарастырылған.
Айтк кетейік, бұлан – елімізде сирек кездесетін, аса ірі тұяқты аңдардың бірі. Ол табиғи тепе-теңдікті сақтауда маңызды рөл атқарады және Қазақстанның бірқатар аймағында қорғалатын аңдар тізіміне енгізілген.
Осы орайда, полиция өкілдері табиғат қорғау заңнамасын қатаң сақтауға шақырып отыр.
«Әрбір азамат жабайы табиғатқа құрметпен қарауы тиіс. Егер браконьерлік деректерінің куәсі болсаңыз, дереу полицияға хабарласыңыз», деді ведомство өкілдері.
