Сирек қолжазбалар қорында болды

Сенбі күні Қазақстан Республикасының Мемлекеттік хатшысы Гүлшара Әбдіқалықова Алматыға жұмыс сапары барысында М.О.Әуезов атындағы Әдебиет және өнер институтының ғылыми ұжымымен кездесті. 80 жылдық тарихы бар институт әдебиеттану, фольклористика мен өнертану салаларының басты ғылыми орталығы саналады. Алдымен Мемлекеттік хатшы институттың 500 мыңнан астам құнды құжаттар сақталған сирек қолжазбалар қорымен танысты. Іргелі «Бабалар сөзі» 100 томдығы осы қор материалдарының негізінде әзірленген. Кездесу барысында инс­титут директоры, ҚР ҰҒА коррес­пондент-мүшесі, филология ғылымдарының докторы Уәлихан Қалижанов ғылыми орталық атқарып отырған ауқымды зерттеулер мен бастамалар туралы жан-жақты әңгімелеп, кеңінен ақпар берді.  Өз кезегінде институт ғалымдары іргелі де ілкімді жобалар жайында баяндады. Мемлекеттік хатшының ға­лым­дармен әңгімелесуі ке­зінде тәуелсіз Қазақстанның әдебиеттануы мен өнертануының қазіргі за­манғы үрдістерін зерделеу, «Қазақстан-2050» Стра­тегиясы мен Мемлекет бас­шысының «Нұрлы Жол – болашаққа бастар жол» атты Жолдауының негізінде халықтың жалпыұлттық құндылықтарын ілгерілету мәселелері талқыланды. Сонымен қатар, институттың қазақ диаспоралары көп шоғыр­ланған Өзбекстан, Ресей, Қы­тай және Моңғолия елде­ріне ұйымдастырған ғылы­ми экс­педицияларының қоры­тындылары бойынша «Шет­ел қазақтарының өнері», «Шетел­дердегі қазақ әдебиеті», «Шетел­дердегі қазақ фольклоры» атты монографиялар жарық көрді. Институт Қазақстан хал­қы Ассамблеясы жылы қар­саңында Қазақстанды ме­кендеген этнос­тардың фольклорын, әдебиеті мен өнерін зерттеуге арналған  «Қазақстан халқының театр өнері», «Қазіргі кезеңдегі Қазақстан халқының әдебиеті», «Астана: геосаяси көшбасшылықтан мәдени сан алуандыққа», «Көне түркі әдебиетінің типологиясы» сияқты бірқатар ұжымдық монографияларды жарыққа шығарды. Г.Әбдіқалықова, сондай-ақ, институтқа қарасты Мұхтар Әуезов мемориалдық музей-үйінде болып, Құрметті қо­нақтар кітабына қолтаңбасын қалдырды. Айнаш ЕСАЛИ, «Егемен Қазақстан». АЛМАТЫ. Суретті түсірген Борис БУЗИН.