Ақтөбе облыстық сотының төрағасы интернет-конференция өткізді

АҚТӨБЕ. 16 ақпан. Ақтөбе облыстық сотының төрағасы Ерлан Айтжанов сот жүйесінің ашықтығын, жариялылығын және қолжетімділігін қамтамасыз ету мақсатында облыс тұрғындары үшін интернет-конференция өткізді. Бұл туралы egemen.kz тілшісі хабарлады. Интернет-конференцияға қатысуға тілек білдірген азаматтар облыстық соттың веб-сайтындағы төраға блогына кіріп, ондағы «Сұрақ-жауап» айдарына өздерін толғандырған мәселелер бойынша сұрақтарын жолдап, оларға сәйкесінше жауаптары жарияланды. Оның ішінде қаладан шалғай аудандардан да хабарласқан адамдар болды. Осы күні облыс тұрғындарынан 4 сауал қойылған. Барлық сұрақтарға онлайн режимінде жауап берілген. Өз кезегінде онлайн режимге байланысқа шыққан хабарласушылар сот төрағасына облыстық сотта халық үшін сот органдары қызметінің ашықтықтығы мен қол жетімділігін қамтамасыз етуге барлық жағдай жасалғанына ризашылықтарын білдірді. Сатыбалды Сәуірбай. Дерек: egemen.kz. Сурет: akt.sud.kz.