Еңбек демалысын алған сайын адам ішкі тыныштықты іздейді емес пе? Біреу шетелге, біреу теңізге қарай жол тартады. Ал біз бұл жолы Баянауылға бет бұрдық. Жай ғана табиғатқа тамсанып, қыдыратын емес, рухани ой түйетін тур іздедік. Сөйтіп жолымыз «Oyorda» атты кітапқұмар жастармен түйісті.
Сапар кезінде жай ғана уақыт өткізбей, «Oyorda» қауымдастығының президенті Ердәулет Құралмен әңгіме өрбіттік. Білім мен руханиятқа ерекше көңіл бөлетін жас мамандығы бойынша инженер-жобалаушы болып шықты. Оның кітапқа деген ынта-ықыласы жастарды ізденіске жетелейтін орта қалыптастыруға итермелеген. Нәтижесінде, өзі секілді жанашыр қатарластарымен бірлесе былтыр жыл басында «Oyorda» қауымдастығын құрған.
– Бұл істі қандай да бір уақытша әуестік жетегіндегі ұстаныммен емес, мақсат-міндеті айқын, өміршең жоба болады деген ниетпен бастадық. Бір топ жас белсендіні тартып, ресми тұсаукесерін жасап, аяқтап алдық. Бүгінде, міне бір жарым жыл ішінде тек кітап оқуды насихаттайтын ортадан жас буынның тұлғалық дамуына сеп болатын, тәрбиелейтін тұғырлы ордаға айналдық. Бастапқыда бекітілген ережеге сәйкес «Oyorda» үш айлық маусымды қамтиды. Осы аралықта оқырмандар тұлғалық даму, іскерлік әдебиет, көркем шығарма сынды әр жанрға сай, бірнеше топқа бөлініп, бағытына қарай кітап оқиды. Кейін сол түйгендерін топпен жүздесіп, бірлесе талқылайды. Әрқайсысы жеке-жеке ойын ортаға салып, көп алдында сөз сөйлейді. Осылайша, азаматтарда кейіпкерлерді саралау, оқиғаны талдау, сыни ойлау, сөз саптау деген секілді дағдылар қалыптасады, – дейді Е.Құрал.
Бір ерекшелігі – жас оқырмандар клубына мүше болу ақылы. Маусымдық бағасы – шамамен 12 мың теңге. Бірақ бұдан тартынып жатқан студенттер жоқ. Қазірдің өзінде ойлы жастар ордасында 300-ге тарта кітапқұмар оқырман бар. Қауымдастық президенті тіпті маусымға тіркеуге үлгермей қалғандар қанша ақша ұсынса да топқа қосылмайтынын айтты. Өйткені «Oyorda»-ның басты кредосы – жауапкершілік.
– Бізде бекіген нақты жүйе бар. Тек оны уақытқа сай, жаңалап отырамыз. Қауымдастыққа мүше оқырмандарды қадағалап отыратын ұйымдастырушылар болады. Олар еңбекақы алмайды, еріктілік негізде жұмыс істейді. Алайда клубтағы әр үйлестірушіден жүйенің жүйелі жұмыс істеуі үшін ниет пен ерекше жауапкершілік талап етіледі. Бұл да бір жақсы әдет қалыптастырудың кілті, – дейді ол.
Әңгіме барысында байқағанымыздай, қауымдастықтың аясы – кең. Кітап талқылаудан бөлек жастар неше түрлі куиздер, мәдени кештер, саяхат пен турнирлер жиі ұйымдастырады. Мен осы «Oyorda Sapar» жобасына ілігіппін. Бастама еліміздің түрлі аймақтарындағы тарихи-мәдени жерлерімен танысу арқылы жас буынның таным көкжиегін кеңейтуді көздейді. Бұған дейін ойордалықтар Қарағанды, Алматы қаласы мен Көкшеге сапарлап келген.
Ал «Oyorda Talks» аясында қазақ тілді үздік мамандар мен жоба авторлары, зиялы қауым өкілдері спикер ретінде шақырылып, идея алмасады. «Cash Flow» болса, жастардың қаржылық сауатын арттырып, инвестиция, кәсіпкерлік шешімдер мен ақша басқару дағдыларын қалыптастыруға арналған. Бұдан бөлек жайлы атмосферада кофе ішіп, кітап оқуға арналған «Oyorda Kitap & Kofe» бар.
– Бұл Астананың оң жағалауында орналасқан кофетерий. Мұнда да аптасына бірнеше рет кітап талқылары, тіл клубтары, мәдени-танымдық кездесулер, әдеби кештер өтіп тұрады. Іс-шараларға кез келген адам келе алады, яғни біздің қауымдастық мүшесі болуы міндетті емес. Айта кетерлігі, қазір біз ел бойынша тағы екі жобаны бастап жатырмыз. Біреуі – кітап оқу, екіншісі – жүру және жүгіру марафоны. Бастамалардағы ерекшелік, бірінде қатысушылар арнайы аудио кітапты сыйлыққа алады, енді бірінде ақын-жазушылармен онлайн кездесу ұйымдастырылады. Әзірге жүру және жүгіруге арналған жоба басталып, алғашқы айда Астана, Алматы, Қарағанды, Ақтау қаласынан 40-тан астам азамат тіркелді, – деп ойын түйіндеді Е.Құрал.
Осылайша, алты жарым сағатты артқа тастап, Астана-Павлодар тас жолымен Баянауылға жүйткіп жеттік. Жолдың кейбір тұсы жөнделіп жатқаны болмаса, сапасында мін болмады. Тур бағдарламасына сәйкес алдымен Жасыбай көлінен үш шақырым жерде Баянауылдың биік шоқыларының бірінде орналасқан Қоңыр әулие үңгіріне бардық. Кейін «ә» дегеннен Баянауыл ұлттық паркіне кіріп, табиғатына тамсанып, Кемпіртасқа таңдай қақтық. Әрі қарай Сұлтанмахмұт Торайғыров ауылындағы бұлақ басынан су ішіп, кинорежиссер Шәкен Айманов ескерткішіне, академик Қаныш Сәтбаев музейіне, Мәшһүр Жүсіп кесенесіне аяқ бастық. Жол бойы сөзбен сипаттай алмайтын сұлу сурет тұрғанда шетелге не үшін шабылып жүрміз деп бір ойландық.
Мемлекет басшысы Қасым-Жомарт Тоқаев Ұлттық құрылтайдың «Адал адам – Адал еңбек – Адал табыс» атты үшінші отырысында әлеуметтік, шаруашылық, идеологиялық және басқа да салалардағы бағдарымызды айқындап, нақты шараларды қолға алуымыз керектігін баса айтқан еді. Президент сөз арасында жастарды кітап оқуға баулып, жаппай кітап оқитын ұлтқа айналу маңызды факторлардың бірі екендігін тілге тиек етті. Осы орайда кітап оқу мәдениетін қоғамда орнықтыруға атсалысып жүрген «Oyorda» оқырман қауымдастығы тапсырманы іліп әкеткендей.
