Жуырда ауылда «Заң және Тәртіп» атты кездесу өтіп, елді мекен аумағында алкоголь өнімдерін сатудан ерікті түрде бас тарту туралы бастама көтерілді. Бұл ұсынысты алғашқылардың бірі болып ауыл ақсақалдары қолдады. Олар: «Қоғамның берекесін кетіретін нәрсенің беті аулақ болсын. Арақ ішкен жерде тәртіп пен тиянақ болмайды» деген байламдарын ортаға салып, жастардың болашағы үшін бұл шешімнің маңызын атап өтті.
Кездесу қорытындысында ауыл тұрғындары бірауыздан ішімдікті сату мен таратудан бас тарту жөніндегі хаттамаға қол қойды. Осылайша, Далабай ауылы ішімдіксіз ауылдардың қатарын толықтырды.
Облыстық прокуратура бұл бастаманың құқық бұзушылықтың алдын алу мен қоғамдық келісімді нығайтуда үлгі боларлық тәжірибе екенін атап өтті.
«Мұндай қадамдар еліміздің өзге де өңірлерінде қолға алынып жатыр. Кейбір ауылдарда соңғы жылдары бірде-бір қылмыстық іс тіркелмеген. Бұл халықтың өзі заң мен тәртіпке тірек бола алатынын көрсетеді», делінген прокуратураның ресми хабарламасында.
Айта кету керек, осыған дейін Алматы облысы Балқаш ауданына қарасты Бояулы ауылы да осындай шешім қабылдап, ішімдіктен мүлде бас тартқан. Қазір ол ауылда тәртіп бұзу оқиғалары мен құқыққа қайшы әрекеттер жоқтың қасы.
