Ұлттық қорғаныс университеті – еліміздің Қарулы күштерінің әскери оқу орындарының білім беру және ғылыми қызметін үйлестіретін ірі ведомствоаралық әдістемелік әрі ғылыми орталық саналады. Университет құрылғалы бері 1,5 мыңнан аса жедел-тактикалық және жедел-стратегиялық басқару буынының әскери мамандары даярланған.
– Түлектерді алда әскери бөлімдер мен құрамаларды басқару, армиямыздың жауынгерлік дайындығы мен кәсібилігін арттыру сынды маңызды міндеттер күтіп тұр. Осы жылы біздің офицерлермен қатар, Қырғызстан және Тәжікстанның да офицерлері білім алды. Бұл өзара әскери ынтымақтастық пен бауырластықты нығайтуға сеп болады, – деді Қорғаныс министрінің бірінші орынбасары – Бас штаб бастығы Сұлтан Камалетдинов.
Биыл білім ордасынан түлеп ұшқандар қатарында ІІМ Ұлттық ұланының 19 офицері бар. Сондай-ақ құқықтық тәртіп әскері атынан полковник Арман Ысқақов докторантураны аяқтап, PhD ғылыми дәрежесін алды.
– Әскери қызмет жолындағы тағы бір маңызды белес артта қалды. Университетте алған жоғары біліммен қатар, достық, қолдау рухын да өздеріңізбен бірге алып бара жатқандарыңызға сенімдімін. Бұл рух жылдар өте келе нығая түсіп, елдеріміздің қорғаныс қабілетін және бейбіт дамуын қамтамасыз етуге қызмет етеді, – деп Ұлттық ұлан бас қолбасшысының орынбасары Бауыржан Абжанов түлектерге тілек білдірді.
Салтанатты іс-шара соңында Қарулы күштер Ұлттық әскери-патриоттық орталығы және Ұлттық ұланның ән-би ансамблі бірлесе өнер көрсетті. Құрмет қарауылы ротасының сарбаздары қарумен саптық көрініс жасап, көрермендерге әсерлі дефиле тарту етті. Әскери дәстүр бойынша, түлектер салтанатты маршпен сап түзеп, Ұлттық ұланның оркестрі сүйемелдеуімен «Атамекен» патриоттық әнін орындады.
