Осыған орай қаладағы №2 Оқушылар сарайы балалардың жазғы демалысын қызықты әрі тиімді өткізу үшін 10 күндік лагерь қызметін ұйымдастырды. Мекеме басшысы Данияр Егізбаевтың айтуынша, 1 маусымнан тамызға дейін 5 кезең бойынша 625 оқушы лагерьде демала алады. Сондай-ақ әр кезең бойынша 25 баладан бес топ Оқушылар сарайындағы түрлі үйірмеге қатысып, лагерьдегі күндерін қызықты өткізбек. Мұнда жеткіншектер сурет салып, спорттық жаттығулар жасап, қолөнермен айналысып, мобилография мен роботтехниканың қыр-сырын меңгереді.
«Жазғы демалыста балалар қыдырып ойнағысы келеді. Ата-аналар таңертеңнен кешке дейін жұмыста болғандықтан, олар көбінесе көше мен ауладағы ойын алаңдарына барады. Қала берді күні бойы ғаламтор ақтарып, телефон шұқылайды. Сондықтан оқушылардың бос уақытын пайдалы іске жұмсау үшін мекеме жанынан жазғы лагерь ашып отырмыз. Оған Шымкент қаласындағы кез келген жеткіншек жазыла алады. Біздің лагерь балаларға ұнайды деп ойлаймын. Өйткені он күндік демалысты қызықты әрі есте қалатындай етіп өткізуге барымызды саламыз», деді Оқушылар сарайының басшысы Д.Егізбаев.
Бұл білім ошағы 2023 жылы ашылған. Қазір қаладағы ең заманауи Оқушылар сарайы саналады. Мұнда ғылыми бағыттағы түрлі зертхана жұмыс істейді.
Шымкент қаласының білім басқармасы таратқан мәліметке сүйенсек, шаһарда мемлекеттік және жекеменшік 290 мектеп тіркелген. Мұнда 270 мыңнан астам оқушы білім алады. Биыл білім басқармасы балалардың жазғы демалысын тиімді ұйымдастыруға көңіл бөліп отыр. Әсіресе мектеп жанындағы үйірмелер мен аула спорт клубтарына ерекше мән бермек.
«Негізінде балаларды мектептен тыс қосымша біліммен қамту үшін Оқушылар сарайын көбейту қажет. Әзірге қалада осындай үш мекеме бар. Жоспар бойынша шаһардың әр ауданынан бір-бір Оқушылар сарайын ашу көзделген еді. Әлеуметтік мәселені шешуге мемлекет тарапынан кейінгі жылдары жақсы көңіл бөлініп келеді. Сондықтан қалада заманауи Оқушылар сарайының саны арта түседі деген сенімдеміз. Мектептен тыс қосымша білім ұйымдары көп болса, каникул кезінде балалардың жазғы демалыстарын ұйымдастыруға да жақсы», дейді Д.Егізбаев.
Сондай-ақ Шымкент қаласының төтенше жағдайлар департаменті жуырда арнайы брифинг ұйымдастырып, ата-аналарға балаларын қараусыз қалдырмауды ескертті. Департамент мамандарының айтуынша, қалада қауіпті деп танылған 13 су көзі бар. Сондықтан шомылу науқаны кезінде департамент қалалық әкімдікпен бірлесіп, бірқатар қауіпсіздік іс-шараларын ұйымдастырып отыр.
ШЫМКЕНТ
