Жамбылдық жампоздардың жетістігі

Елімізде еркін күрестен бәсе­келестік өте күшті. Елорда төрінде өткен жа­рыста соған тағы бір көз жетті. Мәселен, осы күнге дейін 125 кг салмақ дәрежесінің бас ба­­луаны ­саналып келген Юсуп Батыр­мұр­заев ширек финалда Әлі­шер Ерғалиден ойсырай ұтылды. Сөз жоқ, Әлішер – мықты балуан. Азия чемпионатында төрт рет жеңіс тұғырына көтеріліп, Токио, Париж олимпиадаларына қатысты. Дегенмен Жамбыл облысының өкілі бұл табыстар­ға 97 кг салмақта қол жеткізді. Ал аса ауыр салмақтың өз мықтылары бар. Соған қарамастан Ә.Ерғали Батырмұрзаевты қос жауырынымен жерге қадады. Финалда ақмолалық Нұрсұлтан Азовтан айласын асырды. Үшінші орынға Қарағанды облысының қос алыбы – Серік Бақытханов пен Әлихан Құсайынов табан тіреді.

Әлем чемпионатының қола, Азия ойындарының күміс жүл­дегері, құрлықтың екі дүркін чемпионы Данияр Қайсанов бірден екі салмақ дәрежесіне жоғарылауды жөн көрген екен. Оның бұл шешімі дұрыс болмағаны бәсеке барысында анық байқалды. 86 кг салмақта сайысқа түскен атақты балуан алғашқы айналымнан кейін-ақ көрермендер қатарына қосылды. Данияр Бибарыс Нұрылаұлына жол берді. Ақтөбенің спортшысы алматылық Нұрсұлтан Әбді­халықпен бірге қола медальды қанағат тұтса, алтын, күміс медальдарды Болат Сақаев (Атырау) пен Нұржан Исағалиев (БҚО) иеленді.

57 кг салмақтың үздігі, Азия­ның үш дүркін жүлдегері жам­былдық Рахат Қалжановтың бұл жолы жүлдегерлер қатарынан көрінуге қарым-қабілеті жетпеді. Ойда-жоқта өзінің командалық әріптесі Әділет Әлмұхамедовке жол берді. Әділет финалда Абзал Өкеновті (Астана) сүріндірді. Одан кейінгі орындарда – Вагиф Гасанов (Алматы облысы) пен Дәулет Әмірхан (БҚО).

65 кг салмақта Начын Куулар топ жарды. Ол – Шымкент қаласы­ның атынан сынға түсіп жүргенімен, таза легионер. Туған жері – Тыва. Жасы да 30-ға таяп қалған. Былтыр оны біздің бапкерлер Аммандағы Азия чемпионатына апарды. Ол жақта Куулар ойсырай ұтылды. Астанада Начын алдына жан сал­мады. Финалда Мейрамбек Қарт­байды (Ақтөбе) бір ғана ұпай айырмашылығымен ұтты. Бекзат Сыбанбай (ШҚО) мен Шерхан Әбіл (Алматы) үздік үштікті түйін­деді. 97 кг салмақта Бекзат Үркім­байға (Астана) тең келер ешкім табылмады. Ақтық бәсекеде ол Рус­там Экажевты (Астана) еңсерді. Нұрдәулет Бекенов (ШҚО) пен Әкежан Айтбековке (Жетісу) қола медаль бұйырды.

Келесі күні тағы бес салмақ дәре­жесінде жеңімпаздар мен жүл­дегерлер анықталды. 61 кг сал­мақта Әділ Оспанов (Қараған­ды) озды. Шешуші сайыста ол Асыл Айтақыннан (Алматы облысы) айласын асырды. 70 кг сал­мақтың финалында Майис Әлиев (Маңғыстау) Мейіржан Әші­ровтен (Жамбыл) басым түсті. Бұл бәсекенің тағды­рын бір ғана ұпай шешті. 74 кг салмақта Әлі­бек Әбдіқасымовтың (Алматы об­лысы) асығы алшысынан түсті. 79 кг салмақтың бас жүлдесін 27 жастағы Дәулет Ергеш (Жамбыл) пен 38 жастағы Нұрлан Бекжа­нов (Астана) өзара сарапқа салды. Жастар арасындағы әлем бірін­шілігінің күміс жүлдегері ере­сектер арасындағы әлем чем­пио­натының финалисін ұтты. 92 кг салмақта Азамат Дәулетбековтің (ШҚО) мерейі үстем болды. Атақ­ты балуан финалда Самир Дурсу­новты айқын басымдықпен ұтты.

Жалпыкомандалық есепте Жам­был облысының жампоздары ал­дарына жан салмады. Алматы қаласының апайтөстері екінші орын алса, үздік үштікті Шығыс Қазақстан облысының балуандары түйіндеді.