Фото: Ашық дереккөз
Мемлекеттік кірістер комитетінің хабарлауынша, OpenAI компаниясы әзірлеген танымал ChatGPT жүйесі енді Қазақстан аумағында көрсетілген цифрлық қызметтері үшін қосылған құн салығын (ҚҚС) төлейтін болады. Бұл қадам трансұлттық ІТ-компанияларға әділ салық салуды қамтамасыз етуде маңызды кезең саналады.
«ChatGPT — бұл жасанды интеллектіге негізделген чат-бот. GPT (Generative Pre-trained Transformer) тілдік моделі негізінде жұмыс істейді және келесідей мүмкіндіктерге ие:
- сұрақтар мен өтініштерді түсіну;
- мағыналы әрі қисынды жауаптар құрастыру;
- аударма, хат жазу, кодтау, оқу және басқа да салаларда көмек көрсету.
ChatGPT-ті виртуалды көмекші, кеңесші, сұхбаттасушы немесе шығармашылық пен жұмысқа арналған құрал ретінде пайдалануға болады», делінген хабарламада.
Айта кетейік, цифрлық қызметтерге салық салу тәжірибесі елімізде 2022 жылдан бері жүзеге асырылып келеді. «Google салығы» ретінде белгілі бұл механизм шетелдік ІТ-алыптардың ел экономикасына әділ үлес қосуын қамтамасыз етеді.
Мемлекеттік кірістер комитеті цифрлық платформалармен өзара іс-қимылды жетілдіру, заңнаманы сақтау және салық түсімдерін ұлғайту бағытында жұмысын одан әрі жалғастырады.
