Бесінші рет өтіп отырған жарыс соңғы екі жылда халықаралық мәртебеге ие болды. Биылғы дүбірлі бәйгеге республикамыздың 13 өңірінен, әлемнің 6 мемлекетінен, атап айтсақ, Мажарстан, Иран, Қырғызстан, Ресей, Оңтүстік Африка Республикасынан келген шабандоздарды қоса алғанда, барлығы 19 команда қатысты. Жарыс халықаралық деңгейге көтерілуімен әлем жұртшылығының ат спортына қызығушылығы артып келе жатқанын аңғартады. Жарыс жолына шыққан 19 команданың алтауы ғана мәре сызығына жете алды.
Марафон-бәйгеге қатысушы командалар соңғы күні Алматы облысы, Іле ауданы, Ақши ауылының маңынан жорықты жалғап, Қонаев қаласында аяқтады. Халқымыздың назарын айрықша аударған аламан Қонаев қаласындағы Бердібек Соқпақбаев атындағы саябақта қорытындыланып, жеңімпаздар қала тұрғындары мен атсүйер қауымның зор қошеметіне бөленді.
Саябақта өткен салтанатты іс-шараға Премьер-министрдің кеңесшісі Ералы Тоғжанов, «Amanat» партиясының атқарушы хатшысы Дәулет Кәрібек, Қарағанды облысы әкімінің орынбасары, «Joryq» ат спорты федерациясы қамқоршылық кеңесінің төрағасы Әлібек Әлденей, Ұлттық спорт қауымдастығының президенті Еркебұлан Ілиясов, «Joryq» федерациясының президенті Бақытжан Тұрлыбеков қатысып, байрақты бәсекеде бағы жанып, жеңімпаз атанған қайсар жігіттерді жеңістерімен құттықтады.
«Мемлекет басшысының қолдауымен жүзеге асып отырған жоба – спорттық шара ғана емес, ел мен жерді дәріптейтін ұлағатты іс. Осындай жорықтардың арқасында ұлы далаға иелік етіп отырмыз. Батыр бабаларымыз 500 шақырым емес, 3 мың шақырымға дейін жортып жүріп, ұрпағына ұлан-ғайыр жерді сыйға қалдырды. Оған тікелей себеп болған – қазақтың қазанаты. Соның нәтижесінде тәуелсіз еліміздің Көк туы көкте желбіреп тұр. Бүгінгі сыннан сүрінбей өткен азаматтарға алғысымыз шексіз», – деген Ералы Лұқпанұлы марафон-бәйгеге қолдау білдірген өңір әкіміне, ұйымдастырушыларға алғысын білдірді.
«Amanat» партиясының атқарушы хатшысы Дәулет Кәрібек ұлттық спорт түрлерін дамыту қазақтың салт-дәстүрін сақтау, мәдени мұраны насихаттау ғана емес, сонымен қатар жас ұрпақты тәрбиелеудің маңызды тетігі екенін атап өтті.
«Мемлекет басшысы Қ.Тоқаев Ұлттық құрылтайдың IV отырысында Қазақстан көшпелілер өркениетінің бесігі, дамыған орталығы екенін, түрлі халықтар мен мәдениеттерді біріктіретінін айтты. Мұның жарқын мысалы – елімізде өткен V Дүниежүзілік көшпелілер ойындары. «Amanat» партиясы бұл бағытта ауқымды жұмыс атқарып отыр. Партия жыл сайын халықаралық «Ұлы дала жорығы» марафон-бәйгесін ұйымдастыруға атсалысады. Біз қоғамды ұлттық мәдени-тарихи құндылықтар төңірегінде топтастыруға ұмтыламыз. Сонымен қатар елімізде этнотуризмді дамыту аса маңызды. Партияның «Ұлттық мұра» жобасы жастарды отаншылдық рухта тәрбиелеуге, ұлттық спортты, мәдениетімізді, өнеріміз бен салт-дәстүрімізді дәріптеу арқылы қастерлі құндылықтарымызды дамытуға бағытталған», деді Д.Кәрібек.
Алматы облысының әкімі Марат Сұлтанғазиев те марафон-бәйгенің маңыздылығын айрықша атады.
«Ұлы дала жорығы» – ұлт рухын көтеретін, ел мен жердің бай мұрасын дәріптейтін маңызды оқиға. Марафон-бәйге жай ғана жарыс емес, қазақ халқының тектілігін, шабандоздық өнерін, жүйрік тұлпарға деген сүйіспеншілігін көрсететін ұлы дәстүр. Жарыста жігер мен қайрат, төзім мен шеберлік сынға түсті. Бүгінгі мәреге жеткен әрбір қатысушы – жеңімпаз. 500 шақырымдық сапарды артқа тастап, командалар мәре сызығын абыроймен кесті. Аталған бәйге тарих пен тағылымның, шыдам мен шеберліктің сынға түскен жорығы болды», деген өңір басшысы жеңімпаздарды марапаттады, жобаның сәтті өтуіне үлес қосқан барлық ұйымдастырушыларға, қолдаушыларға, шабандоздарға зор алғысын білдірді.
Көпкүндік сапар жолында шабандоздар қиындыққа мойымай, ұлы даланың кеңдігін жүрегімен сезінді. Жорық барысында командалар Алатаудың баурайындағы Іле өзені, Таңбалы тас тәрізді тарихи орындар мен ұлттық қолөнер, асылтұқымды жылқылар сынды көшпелілер мәдениетінің үздік туындыларымен танысты. Яғни, бәйге халқымыздың салт-дәстүрін танытумен қатар, көрікті табиғатымыз бен этнотуризмді насихаттайтын, ел мен елді жақындастыратын бірегей алаңға айналды.
«Ұлы дала жорығы» марафон-бәйгесіне атсалысқан атбегілер мен ветеринарларға, аспаздар мен су тасушы көлік жүргізушілеріне, жанкүйерлеріне дейін тік тұрып қызмет еткен азаматтардың әрбіріне алғысын білдірген «Joryq» федерациясының президенті Бақытжан Жұмағалиұлы бұл жорықтың алдағы жылдары да жалғасын тауып, ел бірлігін нығайтуға, ұлттық ат спортын жаңғыртуға арқау бола беруіне тілектестігін білдірді.
Бес күнге созылған марафон-бәйгенің қорытындысы бойынша бірінші орынды Астана қаласының командасы иеленді. Олар 500 шақырым қашықтықты 31 сағат 19 минут 5 секундта жүріп өтті. Екінші болып мәре сызығын 32 сағат 26 минут 57 секундта Қырғызстанның (бірінші) командасы кесіп өтті. Жүлделі үшінші орынды Ұлытау облысының командасы иеленді. Олардың уақыт көрсеткіші – 32 сағат 37 минут 47 секунд. Мәре сызығын Маңғыстау облысы төртінші, Алматы облысының командасы бесінші боп кесті.
«Қазақтың қазанаты – Қостанай жылқысы ең ұзақ жарысқа шыдамдылығымен, төзімділігімен ерекшеленетінін дәлелдеді. Бізді қолдаған команда, жақтастарға, бауырларға алғысымыз шексіз. Жеңіске жету жолында бар мүмкіндігімізді жұмылдырдық», дейді Астана командасының жетекшісі Алтай Бимен.
Қазақстан мен шетелдің ең үздік шабандоздары бас қосқан «Ұлы дала жорығы–2025» марафоны ұрпақтар сабақтастығының, қайтпас қайсар рухтың, ұлттық құндылықтарымызға, дара дәстүрімізге деген құрметтің рәмізіне айналды.
Алматы облысы
