Көрмедегі сурет, графика және мүсін өнеріндегі шығармалар халықтың басындағы қилы кезең мен ерлікке толы оқиғаларды әр түрлі буындағы суретшілердің көзімен шынайы көрсетеді. Соғыс тақырыбына арналған көрмелер музейде жыл сайын өткізіледі, себебі бұл – тарих тізбегіндегі тұтас ұрпақ үшін маңызын жоймайтын құнды естелік.
Жоғары кәсіби деңгейде орындалған туындылардың өзегінде жанды өмір бар, әр деталь қарапайымдылық пен шынайылыққа толы, трагизммен, поэтикалық мазмұнмен өрілген өнер туындыларындағы түйін біреу – ерлікті көрсету. Олар Отан алдындағы парыз туралы, ел басына төнген қауіп, озбыр басқыншыны жеңген халықтың жеңісі мен салтанаты туралы айтады.
Экспозицияда В. Антощенко-Оленев, А.Бақтығалиев, Р.Великанова, Н.Гаев, А.Дроздов, П.Зальцман, Қ.Каметов, Ә.Қастеев, М.Кисамединов және басқа да авторлардың графикалық жұмыстары маңызды орын алады. Бұл шығармалардың бірқатары көпшілікке алғаш рет ұсынылып отыр. М.Калимов, В.Киреев, Қ.Телжанов, Е.Төлепбай, М.Хитахунов және басқа да суретшілердің бұрыннан белгілі кейбір кескіндеме жұмыстары графикалық парақтармен біріктірілген.
Экспозицияда еліміздің жетекші мүсіншілері — Е.Мергенов пен С.Сергебаевтың мүсіндік композициялары да көрнекі тұстан көз тартады. Жобаның орталық бөлігінде Л.Калимованың «Бата» гобелені орналасқан.
Көрменің медиа бөлімі Жеңіс жолында жауынгерлік рух пен қайсарлықтың үлгісін көрсетіп, жауға қарсы атойлап шапқан батырлар ерлігін дәріптеуге арналған. Отты жылдардың өшпес шежіресін жазғандардың арасында Қазақстан суретшілерінің есімі де құрметпен аталады, атап айтқанда, Ү.Әжиев, Н.Александров, П.Андриюк, П.Антоненко, К.Баранов, И.Бондаренко, И.Виноградов, В.Воробихин, А.Горовых, П.Данилов, В.Дмитриев, А.Дроздов, А.Евдаков, Д.Елькин, Р.Есіркеев, А.Заковряшин, Г.Иляев, А.Ильин, Д.Калачев, Ж.Қанапьянов, И.Квачко, Ш.Кенжебаев, В.Колоденко, В.Константинов, Г.Максимов, П.Мариковский, Е.Молданиязов, Р.Мейірманов, Н.Наседкин, В.Нестеров, Н.Нұрмұхаммедов және тағы басқалары бар.
Екі бөлімнен тұратын медиаэкспозиция соғыс қаһармандарының портреттік хроникасын, соғысқа қатысқан суретшілердің ерлігіне байланысты сұхбаттар мен деректі фильмдердің трансляциясы — көрерменге алыста қалған жылдардың оқиғаларын тереңірек сезінуге мүмкіндік береді.
АЛМАТЫ
