Бұл – көктем мезгіліне арналған, табиғатты тірі және нұрлы кеңістік ретінде қабылдау идеясын жалғастыратын ерекше туындылар. Ә.Қастеев атындағы Мемлекеттік өнер музейінде жасақталған экспозицияға суретшінің 2008–2025 жылдар аралығында дүниеге келген 21 кескіндемесі енгізілген. Олардың арасында портреттер, пейзаждар, гүлді композициялар және аллегориялық туындылар бар. Көрмедегі әрбір жұмыс – көктемнің, оның жарығының, тынысының жеке күнделігі
іспетті.
Индира Бадамбаева – кескіндеме және графика саласында тынымсыз еңбектеніп келе жатқан көп қырлы дарын иесі. Оның стилі академиялық мектептің, табиғатқа рухани категория ретінде қызығушылықтың және жарыққа деген ұмтылыстың тоғысқан тұсында қалыптасқан. Суретші пейзаж бен натюрмортқа да, мифологиялық бейнелер мен форманың ішкі қозғалысы оқылатын тұжырымдамалық сериялар жасауға да қызығушылық танытады.
«Мәңгілік көктем» көрмесі – уақыттан тыс кеңістіктің рәмізі ретінде бақтың бейнесіне арналған көркем және кескіндемелік айналым. Гүлдер (гүлшетен, бақбақ, түймедақ, лалагүл) сәндік немесе тұрмыстық элементтер ретінде емес, жарық пен тынысы сыртына тепкен тірі жаратылыс ретінде ұсынылған. Олардың бейнесі жанрлық шеңберлерден тыс, бұл туындыларды тыныштық пен ішкі оянудың тұтас ағыны ретінде де қабылдауға болады. Түстік палитра жұмсақ реңктерден қанық жасыл және ашық алтын түстес бояуға дейін құбылады. Түстерді ойната білу шеберлігі француз импрессионизмінің, ең алдымен, Клод Моненің әсерін көрсетеді. Дегенмен, Индира өткінші сәттілікке емес, тұрақтылық пен ішкі үндестікке ұмтылады», – дейді көрменің жетекшісі С.Сырғабаев.
Суретшінің өзі: «Моне Жаратушыға жақын», – деп атап өтіп, кескіндеме арқылы тірі бастауға жақындауға болатынын өз талпынысы негізінде көрсетеді.
Индира Бадамбаева – бірнеше мәрте республикалық және халықаралық жобаларға қатысқан, «Гүлдер елі» атты арт-бояу кітабының және «Harper’s Bazaar Kazakhstan» журналы мұқабасының авторы, сондай-ақ «Көк ту» бейнебаяны мен «Латын қарпіндегі қазақ әліпбиі» жобасы сияқты бірқатар мәдени бастамалардың тең авторы. Суретшінің жұмыстары Ұлыбритания, Испания, Италия, Германия, АҚШ және басқа да елдердің жеке коллекцияларында сақтаулы.
АЛМАТЫ
