Фото: ашық дереккөз
Жас әйел орталыққа ентігу мен ауа жетіспеушілігіне шағымданып түскен. Эхокардиография зерттеуінің нәтижесінде дәрігерлер сол жақ жүрекшеде көлемі 6×4 сантиметр болатын миксома барын анықтаған. Бұл жүрекішілік қанайналымға кедергі келтіріп, өмірге нақты қауіп төндірген.
Кардиохирургтар дереу операция жасап, ісікті толықтай алып тастады. Хирургиялық араласудан кейін жүрек жұмысы қалыпқа келтіріліп, келесі күні-ақ пациент өздігінен жүріп-тұра бастады. Жағдайы жақсарған науқас көп ұзамай үйіне шығарылды.
«Мұндай күрделі жағдайлар дер кезінде жүргізілген диагностика мен кәсіби медициналық көмектің шешуші рөл атқаратынын көрсетеді. Жас әйел өмірдің екінші мүмкіндігіне ие болды. Бұл — дәрігерлер үшін үлкен марапат», деп мәлімдеді кардиологиялық орталықтың мамандары.
Мамандар жүрек ауруларының белгілерін дер кезінде байқап, білікті дәрігерге жүгінудің өмірді сақтап қалудағы маңызын еске салып отыр. Алматы кардиохирургтары көрсеткен жоғары кәсіби шеберлік тағы бір адам өмірін аман сақтап қалуға мүмкіндік берді.
