Фото: Қаржы министрлігі
Министрлік өкілдерінің айтуынша, заңның бірінші жаңашылдықтар блогы сатып алу рәсімдерін оңайлату мен қысқартуға арналған. Бұл сатып алуды жедел жүргізуге, тапсырыс берушілердің өкілеттігін кеңейтуге және рәсімдерді ұзартуға жол бермеуге бағытталған.
Жаңа заңға сәйкес, жеткізуші туралы ақпарат мемлекеттік органдардың ақпараттық жүйелері арқылы қалыптастырылады. Шағымдарды сатып алуды ұйымдастырушы тікелей қарайды. Ал сатып алу қорытындысын даулау тек веб-портал арқылы және конкурс комиссиясы жеңімпазды анықтаған сатып алулар бойынша ғана мүмкін болады.
Сонымен қатар, заңда сыбайлас жемқорлық құқықбұзушылықтары үшін жауапты болған компаниялар, олардың басшылары немесе құрылтайшылары мемлекеттік сатып алуға қатысу құқығынан айырылады. Бұл норма сыбайлас жемқорлық тәуекелдерін барынша азайтуға бағытталған.
Сондай-ақ заң бойынша мемлекеттік сатып алулар мен квазимемлекеттік сектор субъектілерінің сатып алуларына бірыңғай қолжетімділікті қамтамасыз ететін, «Электрондық қаржы орталығы» АҚ базасында құрылған бірыңғай электрондық платформа енгізілді.
Қаржы министрлігі жаңа заңның мемлекеттік сатып алулардың ашықтығы мен тиімділігін арттырып қана қоймай, сатып алынатын тауарлар мен қызметтердің сапасын көтеруге, қатысушылардың жауапкершілігін күшейтуге және отандық өндірушілерді қолдауға мүмкіндік беретінін атап өтті.
