Бұл жігіттің есімі – Зәкіржан Мамлютов. Татар ағайынның баласы. Ата-анасы Петропавлдың жанындағы Мамлют деген шағын қалада туған. Бұл қаланың Зәкіржанға тікелей қатысы бар. Өйткені осы жерге оның арғы бабасы Мамлют ақсақал Қазаннан арбамен көшіп келіп, алғашқы болып қоныс салған екен. Содан қазақтар осы жерді Мәуліт атап кеткен. Орысша жазбада ол кейін Мамлютке айналған.
Зәкіржанның анасы Тараздағы жоғары оқу орнына түсіп, мамандығын сонда алады. Ал әкесі Петропавлдың пединститутын бітіргенімен сүйген қызының жанына барып, екі жас үйленген соң Тараз қаласында тұрып қалады. Содан жас отбасы табиғаты жайлы Таразда 20 жылдай өмір сүріп, туған жерге бертін ғана қоныс аударады. Зәкіржан мен қарындасы сол қалада 1981 жылы дүниеге келген.
Зәкіржанның әкесі Харис жастайынан спортпен айналысып, кейін өзі айналысқан еркін күрестен әлі күнге жаттықтырушы болып келеді. Ал анасы мектепте еңбектен сабақ береді. Өз еңбегімен күн көрген отбасы баласын да еңбекқорлыққа баулып өсіргені көрініп тұрады.
Зәкіржан Солтүстік Қазақстан университетін «Бүкіләлемдік тарих» мамандығы бойынша 2002 жылы бітірген. Студент болып жүрген жылдарында да қоғамдық өмірге белсене араласып, тең құрбысының алды болып жүретін. Қандай ортада болсын білімсіз адам қамал алмайтынын сезген ол, білімін жалғастырып, заң академиясында да оқып, диплом алады. Ал 2020 жылы журналистиканың магистрлігін бітіреді.
Көп білімнің пайдасы оның жан-жақтылығын арттырып, бизнесті де, қоғамдық істерді де, тіпті әкімдікпен жақындықты да қатар алып жүруіне мүмкіндік берген. Ол – қазір «KZ Медиа» компаниясының директоры және «KZ News» ақпараттық порталының басшысы. Соңғы шақырылымда ол Петропавл қалалық мәслихатының депутаттығына сайланған. Зәкіржан – сондай-ақ облыс әкімінің креативтік экономика жөніндегі кеңесшісі. Әрине, ол қаладағы татар этно-мәдени орталығының жұмысына атсалысып, ҚХА жұмысына да қолдау білдіріп жүреді.
«Біздің қаладағы мәселелердің ең үлкені – жолдардың жарамсыздығы, қоқыстың шығарылуы, қаланың әлсіз жарықтандырылуы. Осыларды мәслихаттың отырыстарында үнемі қызу талқылап, сұраулар береміз. Өзім нақты айналысып жүретін тағы бір мәселе – қаламызда жастардың тұрақтануы. Биыл креатив орталықты да сол үшін ашып, шығармашыл жастар үшін шаһарымыздың тартымды болуын көздеп отырмыз», дейді ол.
Күні бойғы алысқан бизнес, түрлі жобалар, кездесулер, қоғамдық жұмыстардан шаршағанда Зәкіржанды үйінде сүйген жары Регина, қос қызғалдағы Ясмин мен София қарсы алады. Регина да – татар қызы, семейлік. Отбасында қазақ тілі жат емес, татар тілін де қолдануға тырысады. Зәкіржан тіл сақталмаса, ұлттың жұтылатынын жақсы біледі. Ол қазақтар сияқты өзінің жеті атасын да айтып бере алады. Сондықтан әулетінде туған тілінде сөйлесуге тырысады.
Петропавл
