Сурет: kp.ru
Қорқыт ата атындағы Қызылорда университеті инженерлік, ауыл шаруашылығы, құрылыс, IT және өндірістік технологиялар салалары бойынша студенттерді тәжірибелік оқытуға басымдық беріп отыр. Оқу орнында жұмысшы мамандықтарының маңыздылығы кеңінен насихатталып, жастардың қызығушылығын арттыру мақсатында түрлі көрмелер, семинарлар мен форумдар ұйымдастырылады.
Облыста жұмысшы мамандықтарын игерген жастарға «Жұмыспен қамту жол картасы», «Даму» мемлекеттік бағдарламалары аясында түрлі гранттар ұсынылып, жұмысқа орналасу мүмкіндіктері кеңейтілді. Алда құрылыс саласын жандандыратын бірнеше іс-шара жоспарда тұр. Оқу орны студенттердің құрылыс жасағын қайта жаңғыртып, жастарды осы іске жұмылдырды. Аймақтағы жұмыс күшін көп талап ететін саладан студенттер қаржы тауып, тәжірибе жинақтайды.
Облыста орта буын мамандар даярлайтын оқу орнының бірі – И.Әбдікәрімов атындағы Қызылорда аграрлық-техникалық жоғары колледжі. Кәсіптік-техникалық білім сапасын жетілдіру бағытында оқу орны өндірісшілермен тығыз байланыс орнатып, олардың талаптарына сәйкес мамандар даярлауға басымдық беріп отыр. Сонымен қатар, дуалды оқыту жүйесін дамыту арқылы түлектердің тәжірибелік дағдыларын арттыруға ерекше көңіл бөлінген. Колледж директорының оқу-өндірістік жұмыстар жөніндегі орынбасары Мағрипа Айтенова бүгінде оқу орны 34 мамандық, 35 біліктілік бойынша орта буын техникалық мамандарын даярлап, ел экономикасының сұранысына сай маман даярлайтынын айтады.
«Колледж өңірге инвестиция салған Германияның «Seven Rivers» компаниясымен әріптестік орнатып, шыны зауытын салу жобасына қажетті техникалық мамандарды даярлау мақсатында арнайы білім бағдарламасын әзірледі. Бұл аймақтың өндірістік әлеуетін арттырып қана қоймай, түлектердің жұмысқа орналасу мүмкіндіктерін де кеңейтеді. Колледж халықаралық тәжірибе алмасу бағытында да белсенді. Былтыр желтоқсан айында оқу орны АҚШ-тың Флорида штатында орналасқан NSSER біліктілікті бағалау орталығының халықаралық аккредитациясынан сәтті өтті. Аккредитация аясында колледждің 11 білім алушысы «Электрмонтаждаушы» құзыреттілігі бойынша халықаралық сертификатқа ие болды», деді Мағрипа Махмұтқызы.
Қаладағы «Оrda» жоғары колледжінде де студенттердің кәсіби дағдыларын дамытуға қатысты бірнеше жоба жасалған. Колледж директорының орынбасары Арайлым Қонақбаева 2023 жылы шеберлікті шыңдау мақсатында Германия мен Швейцариядан білікті тәлімгерлер шақырылғанын айтады. Германиялық маман студенттерге өз елінде автокөлікті жөндеу, техникалық қызмет көрсету саласында көп жылдық тәжірибесі бар білікті маман ретінде дәріс берді, швейцариялық маман IT саласындағы бағдарламалау негіздерінен бастап, кәсіби деңгейге дейінгі оқыту жүйесін енгізді.
«Колледжде газ құбырларын орнату бойынша білім алып жатқан жастар өңірге аса қажет. Олардың дені колледжді бітірмей жатып, тәжірибеден өту кезінде жұмыс тауып алады. Кәсіпорындармен келісім жасасу маман сапасына да серпін беріп отыр. Бұрыннан да бар осы дәстүр Жұмысшы мамандықтары жылында жаңғыра түсті», – дейді А.Қонақбаева.
Мамандардың айтуынша, түлектердің жұмысқа орналасу көрсеткіші жақсы. Әсіресе дәнекерлеуші мамандығын бітіргендер далада қалмайды, жалақылары да жоғары. Электрик мамандығын бітіргендердің көпшілігі айлықтың аздығынан салаға бара бермейді. Колледж оқытушылары осы мәселені аймақтағы өндіріс орны жетекшілерімен «Атамекен» кәсіпкерлер палатасы алаңындағы кездесулерде жиі көтеріп келеді.
ҚЫЗЫЛОРДА
