Тұрғындардың айтуына қарағанда, шақпақ тас төселіп, табиғи суағарларды жауып тастаған.
– Осыдан екі жыл бұрын құрылысшылар іске кіріскенде төбеміз көкке екі-ақ елі жетпей қалды, – дейді қала тұрғыны Жасұлан Кәрібаев. – Әуелгі жоспар бойынша орман шоқтарының етегін кәдімгі саябаққа айналдырмақ еді. Жаяу жүргіншілер жолы төселіп, жайлы орындықтар қойылмақ. Сам жамырағанда аспалы шамдар төңіректі күндізгідей жап-жарық етпек. Халық сенген. Сенген соң қуанған. Ертегідей әдемі жоспар орындала қоймапты. Орындық та, шам да жоқ. Саябақ деген атауы ғана, сая болатын ештеңе көрінбейді. Шақпақ тастар төселген жол көктемгі қызыл судың жолын бөгеп, қорысқа айналды. Өткен жылғы көктемде еріген қар суы лықылдап ағып келіп, жолға тірелген. Ылғалға мелтектеген қыруар ағаш шіри бастады.
Жергілікті тұрғындар сағы сынған саябақтың жайын айтып жергілікті әкімдікке хат жолдаған. Тіпті облыстық орман шаруашылығы және жануарлар әлемі аумақтық инспекциясына да ұжымдық шағым жолдаса керек. Арыз-шағымнан кейін Бұланды аудандық тұрғын үй-коммуналдық шаруашылығы бөлімі, қалалық мәслихат өкілдері, қала әкімі келіп, саябақты көздерімен көріп, аз уақыттың ішінде бәрін тәртіпке келтіреміз деп сендірген. Әйтсе де ешқайсысы жаз бойы ат ізін салмапты. Өткен жылғы ұжымдық шағымға аудан басшылары арнаулы техниканың көмегімен су өткізетін құбырлар орнатылды, жиналып қалған су төгілді. Барлық кемшілік жойылып, орнына келтірілді деген жауап келген.
Шын мәнінде бұл жерге ешкім де келген жоқ дейді қала тұрғындары. Парк маңындағы тұрғындардың айтуларына қарағанда, бұрын суағарлар септігін тигізіп тұрса керек. Көктемгі қар суы жыралар арқылы төменге ағып кететін болған. Қазір бұл жыралар жабылып қалған. Кесірі қыруар ағашқа тиді. Жаз бойы бақа басып кетеді. Батпаққа айналған жердің масасы мен шыбын-шіркейі буып тұрады. Сасық иісі қолқаны қабады. Саябақ ішіндегі жаяу жүргіншілер жүретін жолдың өзі сапасыз салынған. Біреуі жаңа пайда болған көлшікке келіп тірелсе, екіншісі күрт үзіледі.
Саябақты сақтап қаламыз деген ынта болғанымен, нақтылы жұмыс жоқтың қасы. Бұланды аудандық тұрғын үй коммуналдық шаруашылығы бөлімінің басшысы Асылбек Есімовтің пікірінше, саябақты жөндеуден өткізуді көздеген жоба қаржының жетімсіздігінен тоқтап қалған. Конкурс ерте өткізілген, мердігер анықталған. Әйтсе де қаржы жоқ.
– Қазір саябақтағы суды ағызып жібердік, енді су өткізетін құбырды қай жерге орнату туралы ақылдасудамыз, жердің кебуін тосып отырмыз, – дейді бөлім басшысы. – Бәлкім мамыр айының екінші жартысында басталып қалуы мүмкін. Жобаны жұмысты бастаған компания аяқтамақ. Олар су шайып кеткен алаңқайларды да тәртіпке келтіреді.
Қыруар жұмыс күтіп тұр. Қала тұрғындары саябақтың сәнін келетіндігінен үмітті.
Ақмола облысы,
Бұланды ауданы
