Биыл қоныс аударуға республика көлемінде 7 344 квота бөлініп, мемлекеттік қолдау көрсететін 8 облыс – Абай, Ақмола, Қарағанды, Қостанай, Павлодар, Солтүстік Қазақстан, Ұлытау, Шығыс Қазақстан облыстары белгіленді. Осы орайда жуырда еліміздің жұмыс күші тапшы 7 облысынан келген өкілдер Түркістан облысының бірқатар ауданында халықпен кездесіп, жәрмеңкелер ұйымдастырылды.
Өңір халқына 10 мыңнан аса, нақтырақ айтсақ, Солтүстік Қазақстан облысы – 2 959, Шығыс Қазақстан – 2 671, Павлодар – 2 424, Қостанай – 823, Қарағанды – 1 342, Ұлытау – 145, Абай облысы 104 бос жұмыс орнын ұсынды.
Еңбек және халықты әлеуметтік қорғау вице-министрі Асқарбек Ертаев Түркістан облысына жұмыс сапары барысында қоныс аудару жөніндегі өңіраралық жәрмеңкеге барып, жергілікті атқарушы органдардың басшыларымен кездесу өткізді.
«Қоныс аударушыларға ауыл шаруашылығы мақсатындағы жер учаскелерін 5 жыл мерзімге уақытша пайдалануға алуда жеңілдікті жағдайлар жасалды. Қоныс аударушыларға төленетін субсидиялар банктер мен басқа қаржы ұйымдары алдындағы несиелік міндеттемелер бойынша өндіріп алудан қорғалған. Қандастарды немесе қоныс аударушыларды қабылдаудың өңірлік квотасына енгізу, ерікті қоныс аударушыларға мемлекеттік қолдау шараларын көрсету жөніндегі мемлекеттік қызметтердің электрондық форматына көшу жүзеге асырылды», деді вице-министр.
Сондай-ақ А.Ертаев еңбек мобилділігі орталықтарына көшуге ниет білдірген азаматтарға кеңес, өтініш беруге жәрдемдесу жөніндегі жұмысты жандандыруды ұсынды.
«Өткен жылдың ортасынан бастап барлық қоныс аударушыларға FSM Social мобилді қосымшасын енгізу арқылы жергілікті қоғамдастыққа бейімделу және интеграциялау қызметтерінің кең спектрі қолжетімді болды. Осы кезеңде 20,7 мың адам бейімдеу және интеграциялық қызметтермен қамтылды, – деді вице-министр. – «Қоныс аудару картасы» қандастар мен қоныс аударушыларға онлайн режімде қоныстану аймағымен, сонымен бірге еңбек нарығындағы ағымдағы бос жұмыс орындарымен, тұрғын үйдің, қолданыстағы инфрақұрылымның болуымен танысуға мүмкіндік береді».
Павлодар облысы еңбек мобилділігі орталығының директоры Меруерт Есембаеваның айтуынша, биыл облысқа қоныс аударуға 3 354 квота бөлініп отыр. Өткен жылы халқы тығыз орналасқан өңірлерден 2 170 адам қоныс аударған. Оның ішінде, Түркістан облысынан 807 адам барған. Шығыс Қазақстан облысы, Марқакөл ауданының әкімі Рүстембек Кемешев 2025 жылға 269 қандас пен 372 қоныс аударушы көшіп келеді деп жоспарланғанын айтты. Жалпы, 2024 жылы Шығыс Қазақстан облысына 781 адам қоныс аударған. Солтүстік Қазақстан облысы, Мағжан Жұмабаев ауданына қарасты «Писаревка орта мектебі» КММ-нің директоры Нұржамал Тамбетованың айтуынша, өткен жылы Түркістан облысынан 197 адам көшіп келген. Бүгінде Солтүстік өңірінде 1 643 – оның ішінде, медицина, фармацевтика, білім беру, ауыл шаруашылығы, энергетика, құрылыс, көлік және логистика саласы, сауда саласында бос жұмыс орны бар.
Жәрмеңкеге келушілерге бағдарлама жөніндегі қолдаулар жан-жақты түсіндірілді. Мысалы, бағдарлама аясында қатысушыларға, олардың отбасы мүшелеріне бір рет 70 АЕК (275 240 теңге) мөлшерінде көмек беріледі. Сонымен қатар 12 ай бойы жалдамалы баспана мен коммуналдық төлемдерге арналған жәрдемақы, жұмыспен қамту, ауыл шаруашылығына жер бөлу, жеке кәсіп ашу мүмкіндігі қарастырылған.
Жұмыс күшінің мобилділігін арттыру үшін ерікті түрде қоныс аударуға жәрдемдесу мақсатында өткен «Қоныс аудару» жәрмеңкелерінде солтүстік өңірлерге көшуге ниет білдіргендер де баршылық. Мысалы, Түркістанда өткен жәрмеңке нәтижесінде 128 тұрғын көшуге ниет білдірді. Сайрам ауданынан 50-ден астам, Жетісай ауданынан 38, Мақтааралдан 35 азамат қоныс аударатын болды. Мақтаарал ауданынан 2018–2024 жылдар аралығында 144 отбасы өз еркімен қоныс аударған екен. Айта кетейік, еліміздің жұмыс күші жетіспейтін солтүстік өңірлеріне халықты қоныстандыруға бағытталған жұмыстар облыста 2015 жылдан бері жүргізіліп келеді.
Түркістан облысы
