Төменгі Тайынтыда тынығады

Шығыс өңірінде «Үміт» балалар үйінің тәрбиеленушілеріне арналған жазғы лагерь ашылды. Төменгі Тайынтыда орналасқан «Патшалар жазығы» лагері жуырда күрделі жөндеуден өткен болатын. Сондықтан демалыс орны маусымның әр кезеңінде 150 баладан қабылдай алады. Жаздың алғашқы маусымында мұнда сондай-ақ, Алматы қаласының №2 «Алтын ұя» балалар үйінің 20 тәрбиеленушісі де демалуда. Жазғы лагерь барлық оқу­шы­лардың сапқа тұрғызылып, мем­лекеттік Тудың көкке көтері­луі­мен салтанатты түрде ашылды. – Сіздер, биыл жазғы мау­сым­ды өңіріміздегі ең көркем жерде өткізіп қана қоймай, жа­ңа достар табасыздар, ден­сау­лық­тарыңызды ны­ғай­та­сыздар. Об­лыс басшылығы сіздердің жақсылап тынығып, жаңа оқу жы­лына үлкен күш-қуатпен ке­лулеріңізге барлық жағ­дайды жасап отыр, – деді лагерьдің ашылуымен құттық­таған облыс әкімінің орынбасары Жақсылық Омар. Жаңа маусымның тұсау­ке­серіне орай ұйымдастырылған концертте «Үміт» балалар үйінің жас таланттары мен «Х-Фактор» шоуының жеңімпазы, «Үміт» балалар үйінің түлегі Евгений Выблов өнер көрсетті. Алматылық «Алтын ұя» балалары жаңа дос­тарына өз қолдарынан шыққан ерекше картиналар мен панно сыйлады. Кешкілік балалар ойын ойнап, алау жағып, ән айтты. Облыстық білім басқар­масының хабарлауынша, Шығыс Қазақстан облысы мен Алматы қаласының әкімдіктері арасында қабылданған меморандум аясында «Патшалар жазығы» балалар лагерінде жаз бойы алматылық «Алтын ұя» балалар үйінің 90 тәрбиеленушісі демалады. Думан АНАШ, «Егемен Қазақстан». Шығыс Қазақстан облысы, Ұлан ауданы.