Облыстық төтенше жағдайлар департаменті кеше бірнеше елді мекенмен арадағы жол бүлініп, қатынас тоқтағанын хабарлады. Теректі ауданында Сарыөмір мен Дуана арасындағы дала жолын үш жерден қар суы басып өткен. Осы аудандағы Қандық, Құмақсай, Төңкеріс ауылдарына баратын жолға да су толып, қозғалысқа бөгет жасады. Қаратөбе ауданындағы Ақтайсай ауылына, Шыңғырлау ауданындағы Ардақ, Ақтау ауылдарына да баратын жол уақытша жабылды. «Қазіргі уақытта аудандық маңызы бар 5 жолдың 8 бөлігі қалпына келтірілді, қалған бір бөлікте әлі су өтіп жатыр», деп хабарлады департаменттің баспасөз қызметі.
Облыстық маңызы бар «Бөрлі–Ақсай–Жымпиты» автожолының 134-шақырымында, Сырым ауданына қарасты Аралтөбе ауылының маңында Шідерті өзенінің су деңгейі күрт көтеріліп, уақытша көпірдің кіреберіс жолдарын су шайып кеткен. Бұл жерде қазір арнайы техника мен мамандар кезекшілікте тұр. Қажетті материалдар, құм мен қиыршық тас дайындалған, қапшықтар құммен толтырылып жатыр. Су саябыр тапса, жол қатынасы қалпына келтіріледі.
Премьер-министр Олжас Бектенов су тасқынына қарсы іс-шараларды үйлестіру жөніндегі республикалық штаб отырысын өткізіп, жиында облыс әкімі Нариман Төреғалиев өңірде көктемгі су тасқынының алдын алу мақсатында жасалып жатқан шаралар туралы есеп берген еді.
«Ұзындығы 143 шақырым болатын 81 қорғаныс бөгеті салынды, 9 шақырым су бұру арнасы, 93 шақырым арық қазылды, елді мекендерге 582 метрлік су өткізу құбыры орнатылды, 74 шақырым магистральдық канал тазартылды. Облыстағы барлық суқоймасы транзиттік режімде жұмыс істеп тұр», деп мәлім етті Н.Төреғалиев.
Өңірде материалдық-техникалық ресурс қоры жасақталған. 1,8 мың арнайы техника, 123 жүзу құралы, 455 мотопомпа, 4 мыңнан астам қызметкер бір тәулікте іске қосыла алады. Сонымен қатар 12 мың тоннадан астам инертті материал, 413 мың қап, 423 тонна жанар-жағармай қоры дайын тұр. 95 мыңнан астам құм салынған қап әзірленген. 32 мың адам орналаса алатын 317 уақытша эвакуациялық бекет дайындалды. Сондай-ақ төрт түлік малды қауіпсіз аймаққа көшіру үшін 195 арнайы орын белгіленді.
Облыстық су тасқынына қарсы штаб жұмысын 10 наурызда бастап кеткен. Қазір су тасқынына дайындық жұмысы қарқынды жүріп жатыр. 27 шақырым су бұру арнасы, 62 шақырым арық, 1 200-ден астам су өткізу құбыры тазартылды.
Орал қаласында көктемгі су тасқынының алдын алу, мұз кептелістерін болдырмау мақсатында өзендердің мұзын жару басталды. Шаған, Деркөл өзендері жайылмаларының 10 бөлігінде, барлығы 10 мың шаршы метр аумақта мұз жарылады. Бұдан бөлек, 5200 ойық ойылып, 13 мың шаршы метрден астам мұз кесілген. «Жағдай толық бақылауда. Қажет жағдайда тәулік бойы кезекшілік ұйымдастырамыз», дейді Орал қалалық ТЖБ бастығының міндетін уақытша атқарушы Олжас Әбдірахман.
«Қазгидромет» мекемесі қазір өңірдегі өзендердің күнделікті су деңгейін мұқият қадағалап отыр. Кейінгі тәулікте Жайық өзеніндегі су деңгейі Жарсуат ауылының тұсында +13, Январцев ауылы маңында +46, Орал қаласында +46, Көшім ауылында +24 см көтерілген. Көп жерде мұз қозғала бастаған, өзеннің жиегіне су толған. Орал қаласы тұсында өзеннің қауіпті деңгейі 850 см болса, қазір 301 см-ге жетті. Яғни дабыл қағуға әлі ерте. Ресей аумағындағы Иреклі суқоймасынан секундына 201 текше метр су түсіп жатыр.
Өңірдегі Шаған, Деркөл, Шыңғырлау, Шідерті, Өлеңті, Бұлдырты, Қалдығайты секілді шағын өзендерден де әзірге қауіп жоқ. Деркөл өзені Тасқала, Зеленов, Белес ауылдары тұсында тәулік ішінде төмен түсті, Шежін өзенінің су деңгейі де азайды, Көпіраңқаты өзені Алғабас ауылы тұсында бір тәулікте 63 см төмен түсті. Мамандар бірнеше өзен бойынша қауіпті кезең артта қалды деп отыр.
«Қазгидромет» мамандарының хабарлауынша, облыс аумағының басым бөлігінде қар толық еріп кеткен. 15-18 наурыз аралығында Бөрлі, Теректі, Шыңғырлау, Сырым, Қаратөбе аудандарындағы өзендерде су деңгейі ең жоғарғы межесінен өтіп, сабасына түсуі керек. Жайық өзеніне осы көктемде келетін су көлемі 3,2-5,2 млрд текше метрден аспайды дейді мамандар. Салыстырар болсақ, былтыр көктемде Жайыққа 11 млрд текше метрден астам су келген екен. Биыл су 2-2,5 есеге аз болады деп болжанып отыр.
Батыс Қазақстан облысы
