Зауыт іске қосылғанда қаладағы өндіріске қажетті жабдықтарды жергілікті жерде өндіру тиімділігін арттыруға септігін тигізбек. Сонымен қатар Жаңаөзенде жұмыссыздық мәселесін шешуге де елеулі әсерін тигізеді. Аумағы 12 гектарды құрайтын аталған жобаның іргетасы өткен жылы өңір басшысының бастамасымен мұнайлы қаладағы №1 өндірістік аймақта қаланған еді. Құрылысты жүргізуді мұнай-газ саласы мен химиялық өндіріс үшін қажетті жабдықтарды шығаратын өңірдегі жетекші машина жасау компанияларының бірі ретінде танымал «Қаскор Инжиниринг» ЖШС қолға алған.
Аймақ басшысы Нұрдәулет Қилыбай биыл көктем айларында ашылады деп межеленген зауыт аумағына барып, құрылыс жұмыстарымен танысты.
Құрылыс аумағында бақылап-өткізу пункті, жатақхана мен асхана құрылыстары пайдалануға дайын, ал негізгі құрылыс алаңында қазіргі таңда металл конструкцияларды монтаждау 75%-ға аяқталған.
Учаске бастығы Жеңіс Тұқаевтың айтуынша, нысанның шатыры мен қасбеті жабылып, құрылыс жұмыстары кестеге сәйкес қарқынды жүргізіліп жатыр. Сондай-ақ қазандық пен қосалқы стансаның құрылысы да бекітілген кестеден кешіккен жоқ.
Қазіргі уақытта құрылыс алаңына 126 адам жұмылдырылған, олардың басым бөлігі Жаңаөзен қаласының тұрғындары. Құрылыс учаскесі басшыларының айтуынша, жабдықтарды орнату 20 ақпанда басталып, наурыз айының соңына дейін ғимараттың контуры толығымен жабылады.
Сапар барысында аймақ басшысы сорғы-компрессорлық құбырлар мен сорғы штангаларын шығаратын зауыт құрылысының жұмыстарына қатысты қажетті барлық шараларды қабылдап, белгіленген мерзімде аяқтауды тапсырды. Сонымен бірге шаруа қожалығы иелерімен кездесіп, ауыл шаруашылығы саласындағы және жалпы елдік мәселелерге де назар аударып, көзқарасын жеткізді.
Маңғыстау облысы
