Жарысқа Алматы облысының бірнеше өңірінен, Алматы, Қонаев қалаларынан кәсіби балықшылар қатысты. Барлығы 15 команда (әрқайсысы 3 адамнан) жеке және командалық есеп бойынша өзара сынға түсті. Біріншілік 5 сағатқа созылды. Нәтижесінде, ең үлкен балық аулаған балықшы Е.Кембаев «Big Fish» ЖШС-ның арнайы жүлдесін жеңіп алды. Командалық есепте «Қонаев-3» командасы 3-орынды, «Наутилус» командасы 2-орынды, «Feeder.kz» командасы 1-орынды қанжығасына байлады.
«Федерацияның құрылғанына бір жылдан енді асты. Осы уақыт ішінде мүшелер саны айтарлықтай артты. Жылына 6-7 рет балық аулау жарысын ұйымдастырып отырамыз. Бұл жолы қолдау көрсеткен Қонаев қаласы әкімдігіне алғыс білдіреміз», деді федерация басшысының орынбасары Дамир Сергібаев.
Жарыс барысында барлық қауіпсіздік талаптары сақталды, мұздың қалыңдығы 70 см болды. Айта кетерлігі, балықшылар демалыстан кейін суқоймасының үстіндегі қоқыстарды жинап кетуге міндетті. Табиғатқа жанашырлық әр демалушының жауапкершілігінен басталады. Қоршаған ортаны ластағанға әкімшілік жаза қарастырылғанын әрдайым есте ұстаған жөн.
Алматы облысы
