Суреттерді түсірген – Нұрбек ИХСАН
«Жұмыстың жаманы жоқ, түптеп келгенде, барлық еңбек қадірлі. Өз ісін жетік меңгергендер ұлт сапасын арттырады. Елімізде еңбек адамының мәртебесі әрқашан өзгелерден биік тұрады. Атаулы жыл осы мақсатты көздейді. Кәсіптік-техникалық оқу орындары білікті кадрлар даярлауы қажет. Бұл ретте аудан орталығындағы аграрлық-техникалық колледжге зор міндет жүктеледі. Түлеп ұшқан мамандардың жұмысқа орналасуы, біліктілігі, өңірде сұранысқа ие мамандықтарға талдау жүргізу – осының бәрі бір сәтке де бақылаудан түсіруге болмайтын жұмыс», деді өз сөзінде аудан басшысы М.Сердалин.
Ақжайық аграрлық-техникалық колледжінің директоры Жарас Сағындықовтың айтуынша, білім ордасы түлектерінің еңбек нарығындағы бәсекелестігін арттыруға басымдық беріліп отыр. Қазір колледжде 166 студент 5 түрлі мамандық бойынша білім алып жатыр. Газ-электрмен дәнекерлеуші, есептеу техникасы, бағдарламалық қамтамасыз ету, тамақтандыруды ұйымдастыру, ауыл шаруашылығын механикаландыру, ветеринария – сұранысқа ие мамандықтар. Аудан орталығындағы мекеме, бизнес өкілдерімен меморандум жасалып, қазірде ветеринария технигі, тамақтандыруды ұйымдастыру мамандықтарына оқитын студенттер теориялық білімді колледжден алып, шеберлігін жергілікті кәсіпорындарда шыңдап жүр.
Алдағы оқу жылынан бастап еліміздің 10-11 сынып оқушылары мектеппен қатар колледжде оқып, кәсіптік-техникалық мамандық ала алады. Сөйтіп, 17-18 жастағы жасөспірім арнайы орта білім алып, еңбек нарығына ерте қадам басады. Колледж түлектерін оқытуға арналған қаражат екі есеге, 437 мың теңгеден 912 теңгеге өседі. Бұл оқу орындарының материалдық-техникалық базасын жаңғыртуға да оң әсер етеді.
Аудандық мансап орталығының директоры Орынбек Жапашев жұмысшы мамандықтарына қысқамерзімді курстарда оқыту жөніндегі ахуалды баяндап берді. Бүгінде ауданда аспаздар мен кондитерге, көлік жүргізушілеріне, сантехник, слесарь, электрик, дәнекерлеуші мамандарға, механик пен тракторшыларға қажеттілік бар. Былтыр ауданда 1 134 адам тұрақты жұмысқа орналасса, соның 80%-ы жұмысшы мамандар болған.
Ақжайық ауданының ғана емес, таяу болашақта облыстың экономикасына үлкен үлес қосқалы отырған «Сәтимола» кен орны туралы жаңалықты халық ықыласпен тыңдады. «Qazaq Kalium LTD» жеке компаниясының бас экономисі Тілеуберген Ғабдоллин жаңа кәсіпорынның калий тыңайтқыштарын өндірудегі мүмкіндігі жөнінде айтып, компания жоспарын жария етті. Компания БҚО-дағы алғашқы калий тау-кен өндірісін дамытуға 2,4 млрд АҚШ доллары көлемінде инвестиция құйғалы отыр.
«2024 жылы әлемде калий хлоридіне қажеттілік 86 млн тонна болды. 2035 жылға қарай бұл қажеттілік 97 млн тоннаға жетеді дейді мамандар. Қазір бұл шикізаттың 26%-ын – Қытай, 17%-ын – АҚШ, 15%-ын – Бразилия, 8%-ын – Үндістан, 9%-ын Оңтүстік Шығыс Азия елдері өндіріп келеді. 2030 жылға дейін әлемдік қажеттіліктің 8%-ын өндіруге қол жеткізсек, осы минералды әлемге экспорттайтын 5 үздік елдің қатарына енеміз», деді Т.Ғабдоллин.
Әлбетте, мұндай нәтижеге жету жолында кәсіпорынға білікті мамандар, оның ішінде қарапайым жұмыскерлер, кеншілер керек. Қажетті мамандар тізімінде 60–70-ке жуық түрлі сала өкілі бар. Қазірдің өзінде жеке компанияға қажет мамандарды даярлау мәселесі қолға алынған. Кәсіпорында 2025 жылы – 500, 2026 жылы – 2000, 2027 жылы – 2500, 2028 жылы – 3000, 2029 жылы – 3500, ал 2030 жылы 4000 маман қызмет етпек.
«Жұмысқа ең алдымен жергілікті тұрғындарды, соның ішінде Базаршолан, Тайпақ, Сарытоғай, Базартөбе ауылдарының өкілдерін аламыз. Олар жерасты шахтасында, өңдеу зауытында, қосалқы өндіріс цехтарында жұмыс істейді», деді Т.Ғабдоллин.
Батыс Қазақстан облысы
