Жарыстың салтанатты ашылуында Париж Олимпиадасының күміс жүлдегері Демеу Жадыраев пен Бейжің Олимпиадасының күміс жүлдегері Нұрбақыт Теңізбаев бозкілемде белдесетін жас спортшылардың жарысына сәттілік тілеп, мерекемен құттықтады.
«Саламатты өмір салтын қалыптастырып, ұлт денсаулығын нығайтудағы басты міндет – балаларды жүйелі денешынықтыру, спортпен шұғылдануға барынша тартуымыз қажет. Жарыстардың жиі өткізілуінің нәтижесінде спорттың әр түрімен айналысуға талпынған балалар көбейіп, олардың спортқа қызығушылығы артып келеді. Бүгінгі жас спортшылар ертеңгі үлкен спорт әлеміне алғашқы қадамдарын жасап жатыр. Бұлардың қатарынан да Демеу Жадыраев, Азамат Дүмбіров, Бекжан Мырзалиев сынды чемпиондар шығарына сенеміз. Дүбірлі додаға тіпті көршілес Қырғызстаннан да балуандар келгені қуантады. Халықаралық ареналарда еліміздің абыройын асқақтату үшін спорт секцияларына ата-аналар балаларын көбірек жіберсе, нұр үстіне нұр болады», деді Кеген ауданының әкімі Н.Теңізбаев.
«Спортшыларды жеңіске жеткізетін – еңбекқорлық. Жоғары дайындық пен ынта-жігер болса, алынбайтын қамал жоқ. Бала кезімде Олимпиада чемпиондары мен басқа да атақты спортшыларға қарап, солар сияқты болуға ұмтылатынмын. Балалардың бізге де солай қарайтынына қуаныштымын, дән ризамын», деді Д.Жадыраев.
Тартысты бәсекеге барлығы 16 команда, 350-ден аса балуан қатысты. Екі күнге созылған жарыстың нәтижесінде өз салмақ дәрежелерінде Талғар өңірінен келген Қуаныш Нұрасыл, Дәулет Ернұр, Талғат Нұрәлім, Мейрамбек Мансұр жеңімпаз атанды. Сондай-ақ Кеген аудандық спорт мектебінің тәрбиеленушілері Байқұрман Рамазан, Бақиқожа Ибрагим, Қарасай ауданынан қатысқан Орынбай Мейіржан, Қырғызстаннан келген Сұлтан Бейшебаев, алматылық Ким Роллан үздік деп танылды.
Алматы облысы
