Батыс Қазақстан жолдарының 27,8 пайызы ғана қауіпсіз

ОРАЛ. 17 маусым. Батыс Қазақстан облысында жол-көлік оқиғасы көбейіп барады. Мұның басты себебінің бірі – ой-шұңқыры көп жолдар болып отыр. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлады. Аталған департаменттің әкімшілік полиция басқармасы бастығының орынбасары Сәкен Хайруллиннің айтуынша, көлік апатының көбеюіне тағы бір себеп – өңірдегі автомобильдер санының өсуі. Оның саны 2010 жылдан бері 47,1 пайызға көтерілген. Ал 2015 жылдың бес айында 8,9 мың автомобиль есепке қойылған. Сондай-ақ, Орал арқылы өтетін транзиттік көлік тасқыны да ұлғайған. Алдағы уақытта 1 млн. 100 мың автокөлік Орал жолдары үстімен өтеді деп күтілуде. Бақылау мен тексеру нәтижелері бойынша, облыстық маңызы бар жолдардың 27,8 пайызы ғана белгіленген қауіпсіздік нормаларына сәйкес екендігі анықталды. Көп жерлерде қосымша жол белгілері, арнайы жолақтар және бағдаршамдар қойылмаған. Соған байланысты жол-көлік ережелерін бұзушылардың саны да артуда. Одан бөлек, алкогольдік ішімдік ішіп көлік жүргізетіндердің саны 3,6 пайызға көбірек ұсталған. Бұл ретте жол-көлік оқиғасы салдарынан қаза тапқандар санының 8 пайызға қысқарғаны ғана көңілге медеу. Темір Құсайын. Дерек: egemen.kz. Сурет: aif.ru.