Солтүстік Қазақстанда әлем чемпионатына қатысатындар анықталды

ПЕТРОПАВЛ. 17 маусым. Еліміздің әр облысынан жиналған гір көтерушілер мен қол күресінің шеберлері бірнеше күн бойы күш сынасып, ең мықтылары Ирландия мен Малайзияда өтетін әлемдік додаға берілетін жолдамаларды ұтып алды. Бұл туралы облыстық дене шынықтыру және спорт басқармасы хабарлады. Гір тасын көтерушілер арасында барлық жүлделі орындарды алаң иелері иеленіп, жалпы командалық есепте де үздік шықты. Екінші, үшінші орындарға қостанайлықтар мен павлодарлықтар жайғасты. Өз салмақтары бойынша жеңістің ең биік тұғырына көтерілген Елена Костенко (58 кг.), Наталья Нохрина (68 кг.), Михаил Вологодский (73 кг.) және Виталий Диденко (95кг-нан жоғары) енді қараша айында Ирландияда Қазақстанның намысын қорғайтын болады. Армрестлингшілер арасынан жалпыкомандалық есепте Жамбыл облысының спортшылары жеңімпаз атанды.  Алматылықтар мен оңтүстікқазақстандықтар екінші, үшінші орындарды бөлісті. Ал қыркүйек айында Малайзияда өтетін әлемдік жарысқа Солтүстік Қазақстан облысы атынан Виктория Фролова (70 кг-ға дейін), Юрий Вобликов (80 кг-ға дейін) және Павел Луканин (90 кг-ға дейін) қатысады. Өмір Есқали. Дерек: Солтүстік Қазақстан облыстық дене шынықтыру және спорт басқармасы. Сурет: egemen.kz