Ауыл шаруашылығы министрлігінің комитет басшысы тағайындалды

АСТАНА. 16 маусым. Ауыл шаруашылығы министрлігінің ветеринариялық бақылау және қадағалау комитетінің төрағасы болып Сақташ Хасенов тағайындалды. Бұл туралы аталған министрліктің баспасөз қызметі хабарлады. Сақташ Сатыбалдыұлы Хасенов 1960 жылы 12 қаңтарда Қостанай облысы Қарақалпақ ауылында туған. 1982 жылы Ленинград ауыл шаруашылығы институтын агрономия мамандығы бойынша бітірді. Еңбек жолын 1982 жылы Псков облысы «Қарамыш» совхозының бас агрономы ретінде бастады. 1997-2000 жылдары Қостанай облысының «30 лет Целины» атындағы совхоз директоры, Ауыл шаруашылық министрлігі Қостанай облыстық аумақтық басқармасының бастығы қызметтерін атқарды. Ал 2000-2005 жылдары Ауыл шаруашылығы министрлігінің құрылымдық бөлімшелерінде жұмыс жасады. 2005-2006 және 2010-2011 жылдары Ауыл шаруашылығы вице-министрі болды. Сондай-ақ, аталған министрліктің агроөнеркәсіптік кешеніндегі мемлекеттік инспекция комитетін басқарды. Ауыл шаруашылығы ғылымының кандидаты. «Құрмет» орденнің иегері (2006 ж.). Еламан Қоңыр. Дерек: Ауыл шаруашылығы министрлігінің баспасөз қызметі. Сурет: ortcom.kz.