Атыраудағы ауырған жұмысшылардың диагнозы анықталды

АТЫРАУ. 28 қаңтар. Атыраудағы «Теңіз» кенішінде ауырған жұмысшылардың диагнозы белгілі болды. Бұл туралы egemen.kz тілшісі хабарлады. Бұған дейін хабарлағанымыздай, 26 қаңтарда Жылыой аудандық тұтынушылар құқығын қорғау басқармасына «Теңізшевройл» компаниясының «Теңіз» вахталық қалашығындағы клиникасынан «Имстальком» серіктестігінің 2 қызметкері арасында «менингококкты жұқпа, менингококцемия» диагнозына күдікті жағдайлар туралы жедел хабарламалар келіп түскен. Науқастың бірі көз жұмды. Осыған байланысты құрамында облыстық инфекционист-дәрігер, эпидемиолог-дәрігер, вирусология және бактериология зертханасының меңгерушілері бар бригада құрылып, «Теңіз» вахталық қалашығына іссапарға жіберілген еді. «Эпидемиологиялық тексеру кезінде қайтыс болған адамда аурудың клиникалық белгілері (бастың ауруы, тамағының ауырсынуы, дене қызуының 37,7 градусқа дейін жоғарылауы) 21 қаңтарда басталғаны анықталды. Науқас медициналық көмекке жүгінбеген, өз бетінше емделіп, парацетомол, тағы басқа дәрілер қабылдаған. Дәрігерлік көмекке жүгінген кезде науқаста жүрек жұмысының әлсіреуі, өкпенің ісінуі белгілері болып, ауыр халде болған. Екінші науқаста ауру белгілері 23 қаңтарда басталған. Жағдайы орташа ауыр, тұрақты, қазіргі кезде облыстық жұқпалы аурулар ауруханасында ем қабылдауда. Аурулармен тығыз қарым-қатынаста болған 3 қызметкер «Теңізшевройл» серіктестігінің клиникасына оқшауланып, антибиотиктермен профилактикалық ем алуда. Диагноздары клиникалық дәлелденген, лабораториялық зерттеу жұқпалы аурулар ауруханасы зертханасында жалғасуда» деп хабарлады Атырау облыстық тұтынушылар құқығын қорғау департаменті басшысының орынбасары Ерболат Уайсов. Жолдасбек Шөпеғұл. Дерек: egemen.kz. Сурет: aikyn.kz.