Қостанайда нан қымбаттайтын болды

ҚОСТАНАЙ. 27 қаңтар. Қостанай облысында нанның бағасы өсетін болды. Бұл туралы egemen.kz тілшісі хабарлады. Қостанай облысында осы уақытқа дейін нанның бағасы республика бойынша ең төмен, 42 теңге болып келген. Облыста құрылған әлеуметтік қордың арқасында нанның бағасы төрт жыл бойы қымбаттаған жоқ. Облыс әкімі Нұралы Сәдуақасов облыстағы наубайханалардың қаржылық күрделі жағдайына байланысты әлеуметтік нанның бір бөлкесінің бағасын өсіруге тура келетіндігін айтты. Облыс әкімі Нұралы Сәдуақасов: «Осы кезге дейін біз ең төмен бағаны ұстап келдік. Петропавловск пен Көкшетауда әлеуметтік нанның бір бөлкесі 47-48 теңге болды. Қазір есептеу жұмыстары жүріп жатыр. Егер біз нанның бағасын өсірмесек, диірмендер мен наубайханалардың жағдайы мұнан да төмендейді. Сондықтан бөлке нанның бағасы 3-4 теңгеге көтеріледі», деді. Сонымен қатар аймақ басшысы мұны тұрғындар дұрыс түсінетіндігін де айтты. Нәзира Жәрімбетова. Дерек: egemen.kz. Сурет: yvizion.kz.