«Ақмешіттің» Аралдағы концерті

Қазақ хандығының 550 жылдығы, Қазақстан халқы Ассамблеясының 20 жылдығына орай Қызылорда облыстық «Ақмешіт» фольклорлық ансамблі мен «Томирис» би тобы концерттік бағдар­ла­масымен Арал ауданында сапармен болды. Концерт Арал аудандық мәдениет үйінде өткізілді. Сазгер Абылайхан Ысқақов жетекшілік ететін өнер ұжымы домбыра, қобыз, жетіген, дауылпаз, сырнай, сыбызғы аспаптарында қазақ халқының күйлерін орындап, жиналған қауымды тәнті етті. Ансамбльдің Күнсұлу Түрікпенова, Майра Сәрсенбаева, Марат Сүгірбай сынды танымал жыршыларының орындауындағы термелері аралдықтардың құлақ құрышын қандырды. «Томирис» би тобының мың бұрала билеген билері көрерменнің көзайымына айналып, кеш ажарын аша түсті. Арал ауданының құрметті азаматы Мұрат Сыдықов халыққа көтеріңкі көңіл күй сыйла­ған өнер ұжымына алғысын айтып, ақ батасын берді. «Егемен-ақпарат».