Елордадағы Ұлттық академиялық кітапханада филология ғылымдарының докторы, профессор, мемлекет және қоғам қайраткері Мырзатай Жолдасбековтің жеке кітапханасы ашылды.
Салтанатты ашылу рәсімінде Премьер-Министрдің орынбасары Бердібек Сапарбаев ғалымның елордадағы ең үлкен кітапханаға кітаптарын өткізуін өзгелерге өнеге болар үлкен оқиға ретінде бағалады. «Кітап – білім, мәдениет, болашақ. Сондықтан оның қадірін білуіміз керек. Мемлекет басшысы үлгі көрсетіп, арнайы кітапхана ашқан болатын. Міне, кезінде бірге қызмет атқарған әріптесі, ел ағасы, қоғам қайраткері Мырзекең де кітапханаға өз кітаптарын өткізіп отыр. Мұндай маңыздағы іс-шара бұдан кейін де жалғасын тауып жатса нұр үстіне нұр болмақ» – деді ол.
Шара барысында композитор, өнер зерттеушісі Ілия Жақанов түркітанушы ғалымның шығармашылығы туралы зерттеуге кіріскенін баяндай келіп, жылдар бойы жинаған рухани байлығынан өзгелердің де сусындауын жөн деп тапқан замандасына алғысын айтты. Сондай-ақ, бұл кеште Мәжіліс депутаты Қуаныш Сұлтанов оқиғаны елдің рухани санасының өсуіне септігін тигізетін әрі зиялы қауымның сапасын көрсететін жағдай деп атап өтті.
«Менің замандастарым дүние емес, кітап жинады. Мен де бұларды жылдар бойы тірнектеп жиып едім. Бұлардың ішінде сырласым да, мұңдасым да көп. Бірге ұйықтап, бірге оянатын, жата-жастана оқитын кітаптарым да болды. Енді міне, бәрін кітапханаға өткізіп отырмын...» – деген белгілі ғалым кітаптарын өткізуге себепші болған Ұлттық академиялық кітапхананың директоры Үмітхан Мұңалбаева екенін де айтты. Сондай-ақ, өзіндегі қазына тек кітаптармен шектелмейтінін, болашақта қазақтың атақты домбыра шеберлерінің жасаған аспаптарын өткізуді де ойластырып жүргенін де мәлімдеді.
Ұлттық академиялық кітапхананың екінші қабатында орналасқан ғалым Мырзатай Жолдасбековтің жеке кітапханасы ақпараттық, мәдени және білім беру міндеттерін орындайтын болады. Яғни, бұл залда ғалымдар мен магистранттарға, басқа да пайдаланушыларға ақпараттық-библиографиялық қызмет ұсынылып, сондай-ақ ара-тұра мәдени-көпшілік шаралар да өткізіліп тұрмақ. Қазіргі кезде жеке кітапхананың қорында тоғыз жарым мыңға жуық кітап пен кәдесыйлар, портреттер, медальдар мен монеталар бар. Кітапханаға жиналған жұртшылық Елбасының өнегесін жалғастырған ел ағасына ризашылығын білдіріп, «Мырзекең мырза екен» деп тарасты.
Айгүл СЕЙІЛОВА,
«Егемен Қазақстан».
Салтанатты ашылу рәсімінде Премьер-Министрдің орынбасары Бердібек Сапарбаев ғалымның елордадағы ең үлкен кітапханаға кітаптарын өткізуін өзгелерге өнеге болар үлкен оқиға ретінде бағалады. «Кітап – білім, мәдениет, болашақ. Сондықтан оның қадірін білуіміз керек. Мемлекет басшысы үлгі көрсетіп, арнайы кітапхана ашқан болатын. Міне, кезінде бірге қызмет атқарған әріптесі, ел ағасы, қоғам қайраткері Мырзекең де кітапханаға өз кітаптарын өткізіп отыр. Мұндай маңыздағы іс-шара бұдан кейін де жалғасын тауып жатса нұр үстіне нұр болмақ» – деді ол.
Шара барысында композитор, өнер зерттеушісі Ілия Жақанов түркітанушы ғалымның шығармашылығы туралы зерттеуге кіріскенін баяндай келіп, жылдар бойы жинаған рухани байлығынан өзгелердің де сусындауын жөн деп тапқан замандасына алғысын айтты. Сондай-ақ, бұл кеште Мәжіліс депутаты Қуаныш Сұлтанов оқиғаны елдің рухани санасының өсуіне септігін тигізетін әрі зиялы қауымның сапасын көрсететін жағдай деп атап өтті.
«Менің замандастарым дүние емес, кітап жинады. Мен де бұларды жылдар бойы тірнектеп жиып едім. Бұлардың ішінде сырласым да, мұңдасым да көп. Бірге ұйықтап, бірге оянатын, жата-жастана оқитын кітаптарым да болды. Енді міне, бәрін кітапханаға өткізіп отырмын...» – деген белгілі ғалым кітаптарын өткізуге себепші болған Ұлттық академиялық кітапхананың директоры Үмітхан Мұңалбаева екенін де айтты. Сондай-ақ, өзіндегі қазына тек кітаптармен шектелмейтінін, болашақта қазақтың атақты домбыра шеберлерінің жасаған аспаптарын өткізуді де ойластырып жүргенін де мәлімдеді.
Ұлттық академиялық кітапхананың екінші қабатында орналасқан ғалым Мырзатай Жолдасбековтің жеке кітапханасы ақпараттық, мәдени және білім беру міндеттерін орындайтын болады. Яғни, бұл залда ғалымдар мен магистранттарға, басқа да пайдаланушыларға ақпараттық-библиографиялық қызмет ұсынылып, сондай-ақ ара-тұра мәдени-көпшілік шаралар да өткізіліп тұрмақ. Қазіргі кезде жеке кітапхананың қорында тоғыз жарым мыңға жуық кітап пен кәдесыйлар, портреттер, медальдар мен монеталар бар. Кітапханаға жиналған жұртшылық Елбасының өнегесін жалғастырған ел ағасына ризашылығын білдіріп, «Мырзекең мырза екен» деп тарасты.
Айгүл СЕЙІЛОВА,
«Егемен Қазақстан».
