фото: ortcom.kz
Өтінім қабылдауға 1 айдан да аз уақыт қалды. Дәлірек айтқанда, 1-сыныпқа құжат қабылдау алдағы 31 тамызға дейін жалғасады. Бүгінге дейін 275 177 өтінім түскен. Бірінші сыныпқа оқушыларды қабылдау бойынша Ақмола, Алматы, Жетісу, Павлодар облыстары 100 пайыз көрсеткішке қол жеткізді. Алдын ала болжам бойынша 2024 жылдың
31 желтоқсанына дейін 6 жасқа толатын балалар саны 370 мыңнан асады, демек осыншама бала мектепке барады деп болжанып отыр.
Министрліктің хабарлауынша, азаматтарға қолайлы болу үшін қызмет көрсету толығымен автоматтандырылды. Ата-аналар мен балалардың заңды өкілдері өз өтінімдерін еgov.kz электронды порталында, сондай-ақ жергілікті атқарушы органдардың ақпараттық жүйелері арқылы тапсыра алады. Бірінші сыныпқа балалар 6 жастан бастап (осы жылдың соңына дейін
6 жасқа толатын 5 жастағы балалар) ата-анасының немесе баланың заңды өкілінің өтініші негізінде қабылданады. Өтінімдерді демалыс пен мереке күндерінен басқа, дүйсенбіден жұмаға дейін өткізуге болады. Ал лицейлер мен гимназияларға балалар емтихансыз қабылданады. Сонымен қатар мектептен мектепке тек каникул кезінде ғана ауысуға рұқсат етілетін шектеу алынып тасталды. Енді жаңа ережелерге сәйкес балалар оқу жылында тұрғылықты жері бойынша мектеп ауыстыру мүмкіндігіне ие болды.
