Жылқылар мен түйелер көше кезіп, көліктерге кедергі келтіруде

Ақтауда көше кезген малдармен күресу – көп жылдардан бері айтылып және шешімін таппай келе жатқан мәселе, енді олардың қатарына Қамбар ата мен Ойсылқара ұрпақтары енгізілді. Ақтауда жасыл алаңқайлар көздің қарашығындай қорға­­­лады. Соңғы кездері тәртіп пен тазалық мәселесі де мықтап қолға алынған. Ішіп-жегені­нің қалдығын кез келген орынға тастай салғандар сол бойда жергілікті телеарна арқы­лы жалпақ жұртқа әжуә болып, өз қоқысын қолымен көтеруге мәжбүр. Алайда, қала маңын­дағы ауылдардың малдары, әсіресе, жылқылар қала ішінде сайрандауға құмар. Шағын аудандардың о шетінен кіріп, бұ шетінен шығып, кей жағдай­ларда жол-көлік қатынасына кәдімгідей қауіп төн­­діретін олар сусыз аймақ алақан­да аялап отырған жасыл алаң­қайлар­ды әп-сәтте отап, жусап кетеді. Бұған дейін Ақтау қала­лық ішкі істер бөлімі айып тұрағына қамағанмен, ол тиімсіз болып табылған. Енді қала кезген қараусыз малдарды  қолға түсірген полиция қызметкерлері оларды мал сою пункттеріне өткіз­бек. Қазіргі таңда Ақтауда төрт мал сою пункті бар. Сол жерде өзге малдармен бірге суарылып, азықтандырылатын малдардың анықталған нақты иелері жемшөп ақысымен бірге, айыппұл да төлейтін болады, ал иесі табылмаған жағдайда жылқылар етке өткізіледі. Ал Ақтау қалалық кәс­іп­керлік, ауыл шаруашылығы және ветеринария бөлімі қыз­меткерлері жуық арада жеке малдардың арнайы белгі тағудан өткізілетіндігін, содан соң «бұзық» мал иелерін қиналмай табуға болатындығын айтуда. «Қоршаған ортаның таза­лығын сақтауға түсінігі бар адам­дарды үйрету оңай болмай тұрғанда, мал баласын үйрету қайдан оңай болсын» деген ой келеді екен... Сондай-ақ, Ақтауда ақпан айынан бастап, қаңғыбас күшіктер мен иттерді аулау және жою жұмыстары жүргізілмек. Өткен жылдың соңында құрылған арнайы ветеринарлық станса ұйымдастыратын бұл жұ­мыстар үшін арнайы мобильді жылжымалы крематорийлер сатып алынуы мүмкін. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.