Заң • 20 Мамыр, 2024

Қазақ тілі мен тарихын білмейтіндерге Қазақстан азаматтығы берілмейді - ІІМ

142 рет
көрсетілді
1 мин
оқу үшін

20 мамыр күні Орталық коммуникациялар алаңында өткен брифингте ІІМ-нің ресми өкілі Шыңғыс Алекешов енді Қазақстан азаматтығын алу бойынша талап күшейгенін хабарлады. «Азаматтық туралы» заңда азаматтық берілмейтін жағдайлар тізімі толықтырылды, деп жазады Egemen.kz

Қазақ тілі мен тарихын білмейтіндерге Қазақстан азаматтығы берілмейді - ІІМ

Фото: qamshy.kz

«Енді мемлекеттік қазақ тілін қарапайым деңгейде, еліміздің тарихы мен конституциясының негіздерін білмейтіндірге азаматтық берілмейді. Қажетті деңгейді Ғылым және жоғары білім министрлігі айқындайды. Түзетулер азаматтардың қоғамға тез бейімделуін көздейді. Тілді білу қоғамға тезірек сіңіп, мемлекет өміріне араласуы үшін қажет. Айта кету керек, бұл түзетулер әлемдік тәжірибеге сай», деді Шыңғыс Алекешов.

Көптеген елдерде азаматтық алу үшін мемлекет тарихы мен мемлекеттік тілді білу бойынша емтихан тапсыру қажет. Мысалы, Германияда азаматтық алу үшін үміткерлерге неміс тілін білуге, мәдениеті мен дәстүрлерін сақтауға жоғары талаптар қойылады.

Канадада тарихты және жергілікті тұрғындардың міндеттерін білу, сондай-ақ провинцияға байланысты ағылшын немесе француз тілдерін білетіндігін растайтын тест тапсыру қажет.

Түркияда азаматтық алу кезінде  жалпыға ортақ негізде түрік тілін міндетті түрде білу міндеттеледі.

Тиісті заңға енгізілген талаптарда қос азаматтықты болдырмау үшін Қазақстан азаматтығынан айырудың жаңа негізі де енгізілді.

«Қазақстан азаматтығын алғаннан кейін басқа мемлекеттің паспорттарын пайдаланған жағдайда біздің еліміздің азаматтығы тоқтатылады. Бұған дейін шет мемлекеттің азаматтығын алғаны үшін ғана Қазақстан азаматтығы тоқтатылатын еді», деді ІІМ ресми өкілі.