Жерлестеріміздің арасынан тек Ақмолда Сайрамкез (67 кг) бен Александр Уваровтың (81 кг) жеңіс тұғырына көтерілуге күш-жігері жетті. Екеуі де Солтүстік Кореядан келген сайыпқырандарға есе жіберіп, күміс медальды мойнына ілді. Кирилл Староверкиннің де (96 кг) мықтылар санатынан көрінуге жақсы мүмкіндігі болды. Ол жұлқып көтеруде екінші орын алғанымен, серпе көтеруде осалдық танытты. Нәтижесінде, Кирилл төртінші сатыға тұрақтады.
Ташкентте Солтүстік Корея құрамасының қарқыны өте күшті болды. Ерлердің бәсекесінде Панг Ын Чол (55 кг), Пак Мён Джин (61 кг), Ри Вон Джу (67 кг) және Ри Чонг Сонг (81 кг) қарсылас шақ келтірмей, бас жүлдені олжалады. Осы көрсеткіш командалық есепте көш бастау үшін оларға жеткілікті болды. Қалған алтындарды индонезиялық Рахмат Эрвин Абдулла (73 кг), ирандық Әли Әлипур (89 кг), оңтүстіккореялық Вон Чон Бием (96 кг), өзбекстандық Ақбар Жураев (102 кг) пен Руслан Нуриддинов (109 кг) және сириялық Ман Асаад (+109 кг) иеленді.
Әйелдер сайысында сарапқа салынған 10 бас жүлденің барлығын да Корея түбегінің бикештері жеңіп алды. Солтүстіктен келген Вон Хён Сим (45 кг), Ри Сон Кам (49 кг), Кан Хён Гон (55 кг), Ким Иль Гён (59 кг), Ри Сук (64 кг), Сон Кук Хян (71 кг) және Чон-Чун Хуэйдің (76 кг) шоқтығы биік болса, Оңтүстіктің өкілдері арасында Ким Су Хён (81 кг), Юн Ха Дже (87 кг) және Пак Хе Чжон (87 кг) алдына жан салмады.
