Мекеме басшысы Индира Икапованың айтуынша, Оқушылар сарайы негізгі үйірмелерден бөлек, республикалық деңгейдегі авторлық жобаларды қолға алған. Соның бірі – «Jas talant» республикалық онлайн-конкурсы. «Оқушылар сарайының ұйымдастыруымен ІІІ республикалық «Jas talant» онлайн байқауы өтті. Конкурс Қ.А.Ясауи атындағы ХҚТУ, Халықаралық туризм және меймандостық университеті, М.Әуезов атындағы ОҚУ-мен жасалған меморандумдар аясында білім беру мекемелерінің бітіруші оқушылары мен бітіруші колледж студенттері арасында өтті. Осы орайда 80-ге жуық өтініш келіп, үздік деп танылған 20 қатысушыға оқу орындарының гранттары мен түрлі жеңілдіктер берілді. Сонымен қатар облыстағы көпбалалы, әлеуметтік жағдайы төмен, мамандығы жоқ әйелдер үшін «Ісмер ана» жобасы жұмыс істеп тұр. Жобаға қатысушылар Оқушылар сарайының тігін шеберханасында «Киім моделін жобалау» үйірмесінде тігін өнерін меңгереді. Қазіргі таңға дейін 40-қа жуық ана білім алды. Жобаға қатысқан Ж.Жанболатова 1 млн 200 мың, ал Г. Утепова шағын және орта бизнесті дамыту мақсатында 3 млн теңге көлемінде «Атамекен» Ұлттық кәсіпкерлер палатасының грантын жеңіп алып, өз кәсіптерін дөңгелетіп отыр», дейді Индира Сарқытқызы. Оқушылар сарайы қызметкерлері еліміздің басқа өңірлерінде де көпбалалы аналар мен кәсіптері жоқ әйелдердің әлеуетін арттыруға, құқықтары мен мүмкіндіктерін кеңейтуге бағытталған осы жобаның басталуына көмектесуді мақсат етіп отыр.
Сонымен қатар Оқушылар сарайында «Unisat» – білім беру хабы, «Qumyra» – қыш өнері және «Kade» жобасы қолға алынған. Мысалы, «Kade» жобасы аясында өңірде жасалатын құмыра, қолөнер бұйымдарын, шапандар мен тақияларды және басқа да ұлттық нақыштағы заттарды сатылымға шығарып келеді. Одан бөлек, орталықта кішкентай балаларға арналған интеллектуалдық «Danyshpan Education» дамыту ойындары бар.
ТҮРКІСТАН
