Республикалық конкурс нәтижесінде 35 жасқа дейінгі 50 талантты жас ғалым және 25 жетекші ғалым Мемлекеттік ғылыми стипендияларға ие болғаны белгілі. Министр үздіктерді марапаттау барысында ғылымның алдағы даму бағдарына қатысты міндеттермен де бөлісті.
Оның айтуынша, Президенттің ғылым саласындағы қолдауының нәтижесінде оң өзгерістер орын алып жатыр. Заңнама жетілдіріліп, ғылым саласына бөлінген қаржыландыру екі есеге жуық өсті. Жас ғалымдарға айтарлықтай қолдау көрсетіліп, ғылыми-зерттеу институттарының базасы жаңартылып жатыр. Ғалымдар жетекші ғылыми орталықтарда тағылымдамадан өтіп жүр.
– Мемлекет басшысының тапсырмасы бойынша Ғылым және жоғары білім министрлігі ғалымдар мен ғылыми ұйымдардың, жоғары және жоғары оқу орнынан кейінгі білім беру ұйымдарының қызметкерлерін жан-жақты қолдау мәселелеріне назар аударылып отыр. Осы жылдан бастап отандық ғылымның дамуындағы жаңа кезең басталады. Грантқа ие болған 1 200-ге жуық ғалым жалақымен қамтамасыз етіліп, кепілдендірілген қаржыландыру аясындағы зерттеулер үздіксіз жалғасады. Сондай-ақ гранттық және мақсатты қаржыландыру тетіктері өзгертіліп, кейінгі жылдары ғылымды қаржыландыру екі есеге жуық өсті. Рәсімдердің ашықтығын қамтамасыз ете отырып, ғылымды дамыту, ғалымдарға қолдау көрсету жалғасын табады, – деп атап өтті министр.
Министрліктің мәліметіне сүйенсек, ғылыми зерттеулерді қолдау үшін алдағы 3 жылда 650 млрд теңге бөлініп, ғылымды коммерцияландыруға және қолданбалы ғылымға басымдық берілмек. Тың идеялар мен үздік өнертабыстарды жүзеге асыру үшін 75 млрд теңге қарастырылған. Өткен жылы ғалымдардың жалақысы 2 есеге дейін өсті.
Ғалымдардың мәртебесі өссе, ғылым да дамиды. Ал ғылымы дамыған елдің экономикасы да қарыштайтыны анық. Ғылыми қауымдастықты жігерлі қадамдарға үндеген министр алдағы уақытта ғылым алдындағы тұрған келелі міндеттердің нәтижесі ел өмірінен көрініс береді деген сенім білдірді.
АЛМАТЫ
